BAQ jáne tilshilerdi sotqa berý merzimi 3 jylǵa deıin qysqarady

ASTANA. QazAqparat – Elimizde «Mass-medıa» týraly jańa zań ázirlendi. Ondaǵy jańashyldyqtar týraly Aqparat jáne qoǵamdyq damý vıtse-mınıstri Qanat Ysqaqov aıtyp berdi, dep habarlaıdy QazAqparat tilshisi.

«BAQ týraly zań 1999 jyly qabyldandy. Biz jańa zańnama jobasyn ázirledik. Zańdy ázirleý úshin arnaıy jumys toby quryldy, onyń aıasynda 20 otyrys ótti. Onyń quramynda memlekettik quzyrly organdar jáne úkimettik emes uıym ókilderi bar. Zań jobasy ashyq túrde, qoǵamnyń pikirin eskere otyryp ázirlendi», - dedi Qanat Ysqaqov Májiliste «Mass-medıa» týraly zań jobasyn talqylaý barysynda.

Vıtse-mınıstrdiń aıtýynsha, zań jobasynda birneshe baǵyt qamtylǵan.

«Aldymen BAQ ókilderiniń mártebesi. Maqsat - otandyq BAQ-tyń abyroı, mártebesin kóterý. Eń aldymen shekteý merzimin belgileý. Sebebi qazir shekteý merzimi joq. Basqasha aıtqanda, bizdiń azamattardyń 10,20,30 jyldan keıin de BAQ ókilderin sotqa berýge quqyǵy bar. Endi bul norma 3 jylǵa deıin qysqarady. Atalǵan norma BAQ jumysynyń ilgerileı túsýine septigin tıgizeri sózsiz. Kelesi baǵyt - BAQ ókilderi joldaıtyn saýaldardyń qaralý ýaqyty. Naqty aıtqanda, 7 jumys kúninen 5 kúnge deıin qysqartý. Bul ózgeris tilshilerdiń qysqa merzim ishinde aqparatqa qol jetkizýine múmkindik beredi. Al oqyrman shuǵyl aqparatty ýaqytyly ala alady», - deıdi mınıstrdiń orynbasary.