BAQ: Ulybrıtanııa Trampqa aıryqsha saltanatty qurmet kórsetti

ASTANA. KAZINFORM — AQSh prezıdenti Donald Tramp Ulybrıtanııaǵa memlekettik sapary aıasynda Vındzor qamalynda ótken saltanatty banketke qatysty. Sharaǵa korol ІІІ Karl men Ýels hanshaıymy Ketrın de kelip, Trampqa eń joǵary deńgeıdegi qurmet kórsetildi, dep habarlaıdy Euronews.

Brıtandyq BAQ bul banketti el tarıhyndaǵy eń aýqymdy memlekettik qabyldaýlardyń biri dep baǵalady. Óz sózinde Donald Tramp AQSh pen Ulybrıtanııa arasyndaǵy «baǵa jetpes ári máńgilik odaqty» atap ótip, eki ret memlekettik saparǵa shaqyrylǵan alǵashqy amerıkalyq prezıdent ári saılanǵan saıasatker bolǵanyn «eń joǵary mártebe» dep atady.

Korol ІІІ Karl AQSh prezıdentine álemdegi qaqtyǵystardy toqtatýǵa baǵyttalǵan «jeke úlesi úshin» alǵys bildirdi.

«Bizdiń elderimiz kúrdeli daǵdarystardy sheshýge jáne beıbitshilik ornatýǵa birge atsalysyp keledi. Bul, eń aldymen, sizdiń jeke yntalylyǵyńyzdyń arqasynda júzege asýda», – dedi monarh.

Ol sonymen qatar Ýkraınaǵa qoldaý kórsetý máselesin de kóterdi.

Karldyń súıikti taqyryby – ekologııa da nazardan tys qalǵan joq. Monarh tabıǵatty keler urpaq úshin saqtaý qajettigin aıtty.

Al Donald Tramp qazba otynyna beıildigine qaramastan, koroldiń «ózenderdi qalpyna keltirý jáne aǵash otyrǵyzý» bastamalaryn joǵary baǵalady.

Saltanatty banketke shamamen 150 qonaq shaqyryldy. Olardyń arasynda Apple jetekshisi Tım Kýk, Google DeepMind basshysy Demıs Hassabıs, OpenAI atqarýshy dırektory Sem Altman, sondaı-aq AstraZeneca kompanııasynyń bas dırektory Paskal Sorıo boldy.

Ulybrıtanııaǵa kelgen amerıkalyq bıznes alyptary – Microsoft, Nvidia, Google jáne OpenAI aldaǵy jyldary jasandy ıntellekt, kvanttyq esepteýler jáne azamattyq atom energetıkasy salasyna 31 mlrd fýnt sterlıng (shamamen 42 mlrd dollar) kóleminde ınvestıtsııa salatynyn málimdedi.

Buǵan deıin Google Ulybrıtanııaǵa 5 mlrd fýnt sterlıng ınvestıtsııa salatyny habarlanǵan.