BAQ Úkimet jumysyn árqashanda synap kelgen - Qazaqstannyń Bas redaktorlar klýbynyń prezıdenti
ASTANA. 8 qarasha. QazAqparat - Qazaqstannyń Bas redaktorlar klýbynyń prezıdenti Kenjebolat Joldybaı otandyq buqaralyq aqparat quraldary árqashanda Úkimet jumysyn synap kelgen dep sanaıdy.
Astanada «BAQ pen memlekettik organdardyń ózara baılanysyn jaqsartý» taqyrybynda ótken semınar barysynda jýrnalısterdiń suraqtaryna jaýap bere kele, K.Joldybaı: «BAQ belgili bir mólsherde jáne belgili bir kólemde árqashan syn aıtqan. Múmkin búgingi kúni syn aıtý birinshi orynǵa shyqqan shyǵar. Aıtylǵan syn konstrýktıvti bolsa, onda ol kóterilgen máselelerdiń sheshilýine kómektesedi dep oılaımyn», - dep málimdedi.
Klýb basshysy sońǵy ýaqytta tek táýelsiz BAQ qana emes, sonymen qatar resmı BAQ betterinde de synı materıaldardyń kóptigi jóninde de oıyn ortaǵa saldy.
«Bizdiń barlyǵymyz básekelestik ortadamyz jáne qatań naryq jaǵdaıynda jumys isteımiz. Muqııat jáne turaqty BAQ oqıtyn adam mundaǵy synı sıpattaǵy maqalalar men materıaldardy kóredi, biraq, olar «kóz súrinetindeı» syn emes. Men buǵan qatysty dúrbeleń jasaý orynsyz dep oılaımyn. Kerisinshe, bul bizdiń ortaq isimizge kómektesedi dep sanaımyn», - dep atap ótti belgili qazaqstandyq jýrnalıst.
