BAQ teńdeı qoljetimdi boldy: Kemelbek Oıshybaev monıtorıng nátıjesin jarııalady

NUR-SULTAN. QazAqparat – 10 jeltoqsannan 8 qańtar aralyǵyndaǵy úgit-nasıhat kezeńinde monıtorıngimen 500-ge tarta respýblıkalyq jáne óńirlik BAQ qamtyldy, onyń ishinde 321 gazet, 47 telearna jáne 131 ınternet-resýrs bar. Bul týraly Ortalyq saılaý komıssııasynyń otyrysynda Aqparat jáne qoǵamdyq damý vıtse-mınıstri Kemelbek Oıshybaev málim etti, dep habarlaıdy QazAqparat tilshisi.

Elimizde qoǵamdyq-saıası taqyrypta habar taratyp júrgen barlyq BAQ qamtylǵanyna toqtalǵan vıtse-mınıstr: «Úgit-nasıhat kampanııasyn monıtorıngileý qorytyndysy boıynsha Parlament Májilisiniń jáne máslıhattar depýtattarynyń kezekti saılaýyna qatysty barlyq BAQ-ta 22 myńnan astam materıal jarııalandy (onyń ishinde 8822-si gazette, 6930-y telearnada, 6855-i ınternet-resýrsta). Bul óz kezeginde azamattar men BAQ tarapynan saılaýǵa joǵary qyzyǵýshylyqty taǵy da dáleldep otyr», - dedi.

Telearnalarda «Aq jol» men «Aýyl» partııalary birshama basym bolǵan, ıaǵnı efırlik ýaqyt boıynsha 21 paıyzdan tıesili boldy. Qalǵan partııalar turǵysynda efırlik ýaqyt birdeı deńgeıde bólingen – 19-20 paıyzdan.

Baspasóz BAQ-tarda «Nur Otan» partııasy az-maz basymyraq bolǵany baıqaldy – 23 paıyz. Qalǵan partııalar boıynsha materıaldar aýqymynyń úlesi kelesi deńgeıde kórindi: «Adal» jáne «Aýyl» – 20 paıyzdan, «Aq jol» – 19%, Qazaqstan halyq partııasy – 18%.

Sonymen qatar, ınternet-resýrstarda saıası partııalardyń qyzmetin jarııalaý birdeı deńgeıde qalyptasty, ár partııa boıynsha 20 paıyz shamasynda.

«Áleýmettik jelilerdegi úgit-nasıhatqa toqtalsaq, naýqannyń bastalýyna arnalǵan Ortalyq saılaý komıssııasynyń otyrysynda atap ótkenimdeı, áleýmettik jelilerdegi úgit-nasıhatty esepke almadyq», - dedi Kemelbek Oıshybaev.

Vıtse mınıstr bul baǵytta vedomstvo halyqaralyq tájirıbeni, sondaı-aq zańmen tyıym salynbaǵan kez kelgen tásilmen óziniń azamattyq ustanymyn bildirýde ár adamnyń konstıtýtsııalyq quqyn nazarǵa alǵanyn atap ótti.

«Jalpy, monıtorıng nátıjesi boıynsha qazaqstandyq BAQ saıası partııalarǵa buqaralyq aqparat quraldaryna teńdeı qoljetimdikti qamtamasyz etti dep málimdeı alamyz», - dedi ol.