BAQ taratatyn birqatar aqparattarǵa tyıym salynatyn bolady - Parlament
ASTANA. 18 jeltoqsan. QazAqparat - Buqaralyq aqparat quraldarynda balalarǵa zııanyn tıgizetin birqatar aqparattardy taratýǵa shekteý qoıylyp, tyıym salynady.
Búgin Parlament Májilisiniń jalpy otyrysynda palata depýtattary «Balalardy densaýlyǵy men damýyna zııan tıgizetin aqparattan qorǵaý týraly» zań jobasy boıynsha baıandama jasaǵan depýtat Aldan Smaıyl osylaı málim etti.
«Álem elderiniń bir-birine ashyqtyǵy, telekommýnıkatsııa jelileriniń barynsha ashyqtyǵy, aqparat almasýdaǵy múmkindikterdiń molaıýy rýhanı keńistiktiń tazalyǵy týraly oılandyra bastady. Keıbir aǵymdardyń aqparatty ulttyq dástúrge qarsy baǵyttaýy, qoǵamǵa jat is-áreketter ashyq jáne jasyryn nasıhattaýǵa kóshýi, balalar arasynda sýıtsıd, qatygezdik, eldik murattar men qundylyqtardy jatsyný sekildi jaǵymsyz qylyqtardyń baıqalýy alańdatpaı qoımaıdy. Soǵan oraı, elimizde balalardy zııandy aqparattan qorǵaý týraly zańnyń kerektigine kóz jetkizdik», - deıdi depýtat Aldan Smaıyl.
Onyń aıtýynsha, zań jobasyn ázirleýde álemdik tájirıbeler jiti zerdelenip, zańnamaǵa jańa quqyqtyq uǵymdar engizilip otyr. Onyń aıtýynsha, balalar arasyndaǵy jas toptaryna qandaı aqparattyq ónimder taratýǵa tyıym salynatyndyǵy jáne shek qoıylatyndyǵy aıqyndaldy. Bul úshin balalarǵa arnalǵan ónimderdiń jas synyptamasy, jas sanaty uǵymdary engizilgen.
«Jalpy alǵanda zań jobasy boıynsha qatygezdik pen zorlyq- zombylyqqa qurylǵan, balalar ómirine qatygezdikter tóndiretin is áreketke, sýıtsıdke ıtermeleıtin, pornografııalyq jáne anaıy seksýaldyq sıpattaǵy kórinisterdi qamtıtyn, dástúrli emes seksýaldyq baǵdardy nasıhattaıtyn aqparattyq ónimderge tyıym salý qarastyrylyp otyr. Munymen qosa, otbasy ınstıtýtyn joqqa shyǵaratyn, ulttyq dástúrlerge qarsy úgitteıtin aqparattar da balalarǵa zııandy dep tanylǵan. Telearnalar osy talapqa saı keletin ónimdi, soǵan sáıkestirilgen tańbamen belgilep qana efırge taratýǵa tıis. Kerisinshe jaǵdaılarda, olarǵa zańmen shara qoldanylady», - deıdi A. Smaıyl. Onyń aıtýynsha, zań jobasynda alǵash ret balalarǵa arnalǵan aqparattyq ónimge anyqtama berilip otyr. Mundaı aqparattyq ónim baǵyty, mazmuny, taqyryby, bezendirilýi boıynsha balalarǵa tikeleı arnalǵan ónim bolyp tabylady.
