BAQ-ta Saltanat Núkenovanyń máıitiniń sýretin jarııalaýǵa tyıym salyndy
ASTANA. KAZINFORM – Bıshimbaevtyń soty tikeleı efırden berilip jatqany belgili. Bul rette, qazaqstandyqtar aty shýly sot protsesindegi aqparattarmen tanysýǵa múmkindik alady. Dese de, marqum Saltanattyń aǵasy Aıtbek Amangeldi máıit sýretterin efırge shyǵarýǵa jáne jarııalaýǵa tyıym salýdy surady. Sýdıa Aıjan Qulbaeva bul ótinishti qanaǵattandyrdy.
«Men belgili bir sátterdi efırge shyǵarmaýdy jáne BAQ ókilderinen bul beınelerdi kórsetpeýdi suraımyn. Olardy kórý óte aýyr. Tikeleı efırdi eresekter ǵana emes, balalar da kórip otyrýy múmkin. Bul balalarǵa aýyr zııan keltiredi dep oılaımyn», - dedi Aıtbek Amangeldi.
Bıshimbaev buǵan qarsylyq bildirdi.
«Al men kórsetilýin qalaımyn. Óıtkeni onyń dene jaraqattary týraly ǵalamtorda kóptegen boljamdar aıtyldy. Men alqa bılerdiń, jurtshylyqtyń aıtylǵandardyń shyndyqqa janaspaıtynyna kóz jetkizgenin qalaımyn», - dedi Bıshimbaev.
Sýdıa Aıjan Qulbaeva jábirlenýshiniń ótinishin qanaǵattandyrý týraly sheshim qabyldady.
«Materıaldar alqa bıler alqasyna kórsetiledi, BAQ ókilderine túsirýge ruqsat joq», - dedi sýdıa.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy. Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.
27 naýryzda elordanyń qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabılerdi irikteý ótti. 29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-kerister qalaı bastalǵany týraly málimetter aıtty jáne marqumnyń bet-álpeti kógergen sýret kórsetti.
1 sáýirdegi sot otyrysynda aıyptalýshy Qýandyq Bıshimbaev marqum S. Núkenovanyń týystarynan keshirim surady.
Sondaı-aq sot eks-mınıstr Qýandyq Bıshimbaevtyń isindegi taraptarǵa áleýmettik jelide pikir bildirýge tyıym saldy.
