BAQ: Shotlandııa ulttyq partııasy Kır Starmerge senimsizdik votýmyn daıyndap jatyr
ASTANA. KAZINFORM – Shotlandııa ulttyq partııasy Ulybrıtanııa premer-mınıstri Kır Starmerge senimsizdik votýmyn jarııalamaq nıette. Bul týraly shotlandııalyq Hollyrood basylymy brıtan parlamentindegi fraktsııa jetekshisi Deıv Dýganǵa silteme jasap habarlady.
Buǵan deıin 100-ge jýyq leıborıst depýtat jergilikti saılaýdaǵy partııanyń sátsizdiginen keıin premer-mınıstrdiń otstavkaǵa ketýin talap etken edi. Sondaı-aq narazylyq retinde úkimettiń birqatar sheneýnigi qyzmetinen ketken. Alaıda Starmer ornynan ketýdi josparlamaıtynyn málimdedi.
– Eger premer-mınıstr qyzmetinen ketpese, ShUP fraktsııasy Kır Starmerge senimsizdik votýmyn usynýǵa ýáde berdi, – dep jazady basylym.
Aqparatqa sáıkes, ShUP senimsizdik votýmyn korol Charlz III Lordtar palatasynda zań jobasyna túzetý túrinde engizbek.
– Vestmınsterdegi bılik jolyndaǵy bul tsırktik kúres endi jalǵasa almaıdy. Leıborıster partııasy Ulybrıtanııany haosqa batyrdy jáne ishki tartystarmen ábden áýre bolyp, kómekke muqtaj otbasylar úshin eshteńe istemeı otyr, – dedi Deıv Dýgan.
Buǵan deıin brıtandyq BAQ Kır Starmerdiń otstavkaǵa ketýine qatysty úndeýler aıasynda Ulybrıtanııanyń densaýlyq saqtaý mınıstri Ýes Strıtıng premer-mınıstrlik úshin kúresý maqsatynda qyzmetinen ketýi múmkin ekenin habarlaǵan.
Ulybrıtanııadaǵy óńirlik saılaý ótken beısenbide ótti. Daýys berý Anglııanyń 136 óńirinde uıymdastyryldy. Qorytyndy nátıjege sáıkes, leıborıster mýnıtsıpaldyq keńesterdegi burynǵy 2,2 myńnan astam orynnyń shamamen 1,2 myńynan aıyryldy. Al negizgi jeńimpaz Reform UK ońshyl partııasy bolyp, shamamen 1,4 myń mandat ıelendi.
Aıta keteıik, jýyrda ǵana Ulybrıtanııada balalardy qorǵaý máseleleri jónindegi mınıstr Djess Fıllıps Úkimet basshysy Kır Starmerge narazylyq retinde óz erkimen qyzmetinen ketti.
