BAQ saılaýdan bes kún buryn nemese daýys berý kúngi aldyn ala qorytyndylar týraly aqparat taratpaıdy - Hartııa
Hartııa árbir azamattyń saılaý quqyn júzege asyrýyna múmkindik alý úshin BAQ-tardy saılaý jumystaryn, kandıdattar men saılaý naýqanynyń negizgi kezeńderi, daýys berý rásimi jáne basqa da máseleler týraly kásibı jáne shynaıy aqparat taratýǵa shaqyrady.
«Osyǵan baılanysty bizder, Qazaqstan jýrnalısteri men úkimettik emes uıymdar ókilderi, saılaýdy kórsetý kezinde birqatar qaǵıdattardy ustanatyn bolamyz. Atap aıtqanda, QR zańnamalaryn, jýrnalısterdiń kásibı etıka normalary men minez-qulyq erejeleri buljytpaı saqtalady. Saılaý taqyrybyna arnalǵan barlyq materıaldardy obektıvti, alalaýsyz, aqparattyq turǵyda berip, depýtattyqqa kandıdattarǵa qatysty ádil bolýlaryna yqpal etetin bolamyz. Kandıdattardyń abyroıy men iskerlik bedeline, jeke basyna nuqsan keltirýi yqtımal aqparattardy taratýǵa jol berilmeıdi», - dedi «Bas redaktorlar klýby» qoǵamdyq birlestiginiń prezıdenti Bıbigúl Jeksenbaı.
Onyń aıtýynsha, hartııaǵa qol qoıýshylar belgilengen tártip pen áleýmettik saýalnama júrgizý sharttaryn ustanatyn bolady. Al saýalnama jarııalaý kezinde aýdıtorııaǵa berilgen saýalnama jaýaptary tek qana boljam ekeni eskertiledi. «Saýalnama nátıjeleri týraly nemese saýlaýǵa bes kún buryn jáne daýys berý kúngi aldyn ala qorytyndylar týraly materıaldardy taratpaý. Jalpy Hartııa ózara qurmetke negizdelgen qarym-qatynas júıesin qurýdy, barlyq ózara yqpaldasýshy taraptardyń múddelerin taný men esepke alýdy, senimdi jáne tolyq aqparatqa súıengen joǵary saıası mádenıetti qarastyrady», - dedi B. Jeksenbaı.
