BAQ saıası partııalar men máslıhattar depýtattyǵyna kandıdattar úshin teń jaǵdaılar jasaýǵa múddeli bolýy tıis
ASTANA. QazAqparat - Buqaralyq aqparat quraldary saıası partııalar men máslıhattar depýtattyǵyna kandıdattar úshin teń jaǵdaılar jasaýǵa múddeli bolýy tıis. Bul týraly búgin QR Ortalyq saılaý komıssııasynyń múshesi Tatıana Ohlopkovamálim etti.
Onyń atap ótýinshe, saılaý organdarynyń úgit naýqany kezeńindegi negizgi mindeti - barlyq saıası partııalar men kandıdattarǵa úgit júrgizý úshin teń jaǵdaılar týǵyzý.
«Degenmen, saılaý protsesine tikeleı qatysýshylar ǵana emes, buqaralyq aqparat quraldarynyń ózderi de, Saılaý týraly zańnyń saıası partııalar jáne máslıhattar depýtattyǵyna kandıdattar úshin teń jaǵdaılar jasaý jónindegi talaptaryn iske asyrýǵa múddeli bolýy tıis. Sondaı-aq, úgit naýqany barysyn qoǵamdyq baqylaýdy uıymdastyrý protsesinde azamattyq qoǵam ınstıtýttary, ÚEU jáne baıqaýshylar mańyzdy ról atqarady» - dedi T. Ohlopkova.
T. Ohlopkova Ortalyq saılaý komıssııasy jáne aýmaqtyq saılaý komıssııalary saılaý protsesine qatysýshylardyń úgit naýqanyn júrgizýge baılanysty barlyq ótinishterine barynsha jedel túrde den qoıýǵa tyrysatynyn atap ótti.
«Nátıjesinde, saılaý organdarynyń jáne saılaý protsesine barlyq qatysýshylardyń kúshi saılaý zańnamasynyń talaptaryna jáne halyqaralyq jalpyǵa birdeı tanymal qaǵıdattarǵa sáıkes ádil jáne transparentti saılaý naýqanyn ótkizýge baǵyttalýy tıis» - dedi ol.
