Prezıdenttiń BAQ salasyndaǵy marapattaryna ótinim qabyldaý bastaldy

ASTANA. KAZINFORM – QR Prezıdentiniń baspasóz qyzmeti BAQ salasy boıynsha Memleket basshysynyń 2025 jylǵy syılyqtary men granttaryn, sondaı-aq Alǵysyn alýǵa úmitkerlerden usynymdar qabyldaý bastalǵanyn habarlaıdy. 

Syılyqtar men granttar alýǵa úmitkerlerdi, sondaı-aq Alǵys jarııalaýǵa shyǵarmashylyq ujymdardy BAQ, shyǵarmashylyq odaqtar, qoǵamdyq birlestikter, memlekettik organdar usyna alady.

Árbir BAQ, shyǵarmashylyq odaq, qoǵamdyq birlestik, memlekettik organ syılyqtar men granttar alýǵa eki úmitker ǵana usynýǵa quqyly.

Syılyqtar men granttar alýǵa úmitkerlerdiń jáne Alǵys jarııalaýǵa shyǵarmashylyq ujymdardyń ózin-ózi usynýyna jol berilmeıdi.

Grant ıegeri atanǵan tulǵa syılyq alý úshin keminde 5 jyldan keıin usynylady.

Granttar jasy 35-ten aspaǵan jýrnalısterge beriledi.

Syılyqtar nemese granttar alýǵa buqaralyq aqparat quralynyń, shyǵarmashylyq odaqtyń, qoǵamdyq birlestiktiń, memlekettik organnyń resmı blankisine jazylǵan, birinshi basshy nemese onyń ornyndaǵy adam qol qoıǵan (A4 formattaǵy kólemi 2 paraqtan aspaıtyn) usynym joldanady.

Oǵan mynadaı qujattar qosa usynylady:

• syılyqtar nemese granttar alýǵa usynylǵan úmitkerdiń aty, ákesiniń aty, tegi jáne shyǵarmashylyq búrkenshik esimi (eger bolsa), sondaı-aq atqaratyn laýazymy kórsetilgen negizgi jumys ornynan anyqtama;
• syılyqtar nemese granttar alýǵa usynylǵan úmitkerdiń jeke kýáliginiń nemese tólqujatynyń kóshirmesi;
• syılyqtar nemese granttar alýǵa usynylǵan úmitkerdiń shyǵarmashylyq qyzmetiniń qysqasha sıpattamasy;
• negizgi jarııalanymdarynyń tizimi jáne olardyń kóshirmeleri, aýdıo jáne (nemese) beınematerıaldar nemese sondaı materıaldardyń ınternet-siltemeleriniń tizimi.

Alǵys jarııalaýǵa shyǵarmashylyq odaqtyń, qoǵamdyq birlestiktiń, memlekettik organnyń resmı blankisine jazylǵan, birinshi basshy nemese onyń ornyndaǵy adam qol qoıǵan buqaralyq aqparat quralynyń qyzmeti týraly (A4 formattaǵy kólemi 2 paraqtan aspaıtyn) usynym usynylady.

Konkýrsqa mán-mańyzy joǵary negizgi jarııalanymdar, aýdıo jáne (nemese) beınematerıaldar nemese sondaı materıaldardyń ınternet-siltemeleriniń tizimi usynylady.

Qaraýǵa 2024 jylǵy 1 maýsym men 2025 jylǵy 31 mamyr aralyǵynda jarııalanǵan jáne (nemese) efırge shyqqan materıaldar qabyldanady.

Syılyqtar, granttar alýǵa jáne Alǵys jarııalaýǵa usynylǵan materıaldar men qujattar qaıtarylmaıdy.

Kitaptar BAQ salasyndaǵy nagradalar alýǵa usynylǵan materıal retinde qarastyrylmaıdy. Merzimdi basylymdarda jaryq kórgen maqalalar toptamasyn usynýǵa bolady.

Memleket basshysynyń syılyqtaryn, granttaryn alýǵa jáne Alǵysyn jarııalaýǵa usynymdardy Qoǵamdyq komıssııanyń tóraǵasy, QR Prezıdentiniń keńesshisi – Prezıdenttiń baspasóz hatshysy Rýslan Jeldibaıdyń atyna 2025 jylǵy 10 maýsymǵa deıin (mekenjaı: 010000, Astana q., «Aqorda» rezıdentsııasy) joldaý qajet.

Qaǵaz túrinde joldanatyn qujattar poshta qyzmeti arqyly joǵaryda kórsetilgen mekenjaıǵa jiberiledi nemese «Úkimet úıi» ǵımaratynda (Astana q., Máńgilik el dańǵyly, 6) ornalasqan Prezıdent ákimshiligi Jalpy bóliminiń qyzmettik hat-habar sektory arqyly jumys kúnderi saǵ. 09:00-15:30 (túski úzilis saǵ. 13:00-14:30), senbi kúni saǵ. 10:00-11:00 qabyldanady.

Memlekettik organdardyń usynymdary elektrondyq qujat aınalymynyń biryńǵaı júıesi arqyly tek elektrondyq formatta ǵana qabyldanady, bul qosymshalary elektrondyq tasymaldaǵysh (dısk) arqyly joldanatyn usynymdarǵa qatysty emes.

Baılanys nómirleri:

Tolyq málimet úshin: [phone], 74-41-34, 74-40-51.

Qujattardy qabyldaý boıynsha: [phone], 74-56-32. 

Aıta ketelik Prezıdenttiń BAQ salasyndaǵy syılyqtary men granttary, sondaı-aq Alǵysy bıyl da beriletini týraly jazǵan edik.