BAQ pikiri: 2013 jyldyń úzdik tulǵalary
ASTANA. QazAqparat - Búgin Máskeý qalasynda, reseılik ITAR-TASS aqparattyq agenttiginiń bastamasymen júrgizilgen, «2013-shi jyldaǵy dúnıejúzilik reıtıng»-tiń qorytyndysy jarııalandy.
Onyń nátıjesi boıynsha Reseı Prezıdenti Vladımır Pýtın, «ótken jyldaǵy eń úzdik saıasatker» atandy. Al «Nómir birinshi ǵalym» ataǵyn aǵylshyndyq fızık Pıter Hıggs ıemdense, «Eń tanymal mádenıet qaıratkeri» bolyp kanadalyq jazýshy, Nobel syılyǵynyń laýreaty Elıs Mýnro tanyldy. Bul - halyqaralyq medıa qaýymdastyqtyń bergen baǵasy. Atalmysh úsh atalym boıynsha úzdikterdi anyqtaýǵa álemdegi 80-nen asa memlekettiń 175 aqparattyq agenttigi qatysqan. Buqaralyq aqparat quraldary arasyndaǵy mundaı saýalnama, álem boıynsha tuńǵysh ret ótkizilip otyr, dep habarlaıdy «Qazaqstan» telearnasy. «ITAR-TASS» aqparattyq agenttiginiń bas dırektory Sergeı Mıhaılov «Bul saýalnama ne úshin júrgizildi?» - degen suraqqa: «Qazir kóptegen uıymdar, basylymdar «jyl adamy», «ǵasyr adamy» syndy reıtıngterdi jasaıtyny belgili. Alaıda kóbinese, búkil álemge aqparat taratyp otyrǵan agenttikterdiń pikiri eskerilmeı qalyp jatady. Sondyqtan, biz medıa qaýymdastyqtyń ótken jylǵa bergen baǵasyn bilýge tyrystyq. Bul shara aldaǵy ýaqytta da jalǵasatyn bolady», - dep jaýap berdi.
