BAQ: Pentagon AQSh Qarýly kúshteriniń qurylymyn túbegeıli ózgertýdi kózdep otyr

ASTANA. KAZINFORM — AQSh Qorǵanys mınıstrligi (Pentagon) qarýly kúshter túrleriniń iri qolbasshylyqtarynyń ókilettikterin qysqartýdy, olardy jańa qurylymǵa baǵyndyrýdy, sondaı-aq áskerdiń joǵary qolbasshylyǵyndaǵy kúshter teńgerimin qaıta bólýdi kózdeıtin jospar ázirledi. Bul týraly qupııa qalýdy qalaǵan derekkózderge silteme jasaǵan The Washington Post gazeti jazdy.

Olardyń málimetinshe, Pentagon úlken birikken qolbasshylyqtardyń ókilettigin azaıtyp, olardy jańa uıymdastyrýshylyq modelmen baılanystyrýdy josparlap otyr.

Maqalada atalǵan jospar AQSh-tyń qorǵanys mınıstri Pıt Hegsettiń tapsyrmasymen ázirlengeni jáne prezıdent Donald Tramp ákimshiliginiń Taıaý Shyǵys pen Eýropada buryn jumyldyrylǵan áskerı qatysýdy qysqartyp, resýrstardy qaıta bólýge baǵyttalǵan kúsh-jigeriniń bir bóligi ekeni atap ótiledi.

Materıalǵa sáıkes, reforma aıasynda AQSh Qarýly kúshteriniń Ortalyq qolbasshylyǵynyń (CENTCOM), Eýropalyq qolbasshylyǵynyń (EUCOM) jáne Afrıkalyq qolbasshylyǵynyń (AFRICOM) ókilettikterin qysqartý, keıin olardy «AQSh-tyń Halyqaralyq qolbasshylyǵy» dep atalatyn jańa qurylymǵa biriktirý kózdelip otyr.

Sonymen qatar SOUTHCOM men NORTHCOM-dy «Amerıka qurlyǵy boıynsha AQSh qolbasshylyǵy» (AMERICOM) degen ataýmen birtutas qurylymǵa qaıta uıymdastyrý josparlanyp otyr. Derekkózderdiń habarlaýynsha, Pentagon ókilderi AMERICOM quramynda AQSh-tyń Arktıkalyq qolbasshylyǵyn qurý múmkindigin de talqylaǵan, alaıda keıin bul ıdeıadan bas tartqan.

Jospar júzege asqan jaǵdaıda AQSh Qarýly kúshterindegi jaýyngerlik qolbasshylyqtar sany 11-den 8-ge deıin qysqarady, sondaı-aq qorǵanys mınıstrine tikeleı baǵynatyn generaldar men admıraldar sany da azaıady.

Jarııalanymda Pentagon Kongreske júrgizilip jatqan jumystar týraly tek shekteýli aqparat bergeni, bul Senat pen Ókilder palatasynyń Qarýly kúshter jónindegi komıtetterinde respýblıkalyqtar basym ekeni jáne narazylyq týdyrǵany atap kórsetiledi.

Sondaı-aq jospardyń kúshine enýi úshin qorǵanys mınıstri Pıt Hegset pen prezıdent Donald Tramptyń maquldaýy qajet ekeni, al ózgerister AQSh Qarýly kúshteriniń basqarý qurylymyn aıqyndaıtyn Birikken qolbasshylyq jospary (Unified Command Plan) aıasynda qarastyrylyp jatqany aıtylǵan.

Eske sala keteıik, Pentagonnyń ataýyn ózgertý 2 mlrd dollar shyǵynǵa túsýi múmkin ekeni habarlandy.