BAQ pen onyń ókilderine salynatyn aıyppul kólemi tym úlken - S. Mataev
Búgin Astanada «Qazaqstan Respýblıkasynyń medıa zańnamasyn reformalaýdyń keleshegi» atty taqyrypta ótip jatqan dóńgelek ústel otyrysy boıynsha jýrnalısterge bergen suhbatynda Qazaqstan jýrnalıster odaǵynyń basqarma tóraǵasy Seıitqazy Mataev osylaı málim etti.
Eske sala ketsek, «dóńgelek ústel» barysynda medıa zańnamany jetildirý keleshekteri talqyǵa túsip, onyń ishinde QR Bas prokýratýrasy ázirleýmen aınalysyp jatqan Qylmystyq Kodeks jobasy sheńberindegi qamtylýy múmkin normalar jaıynda áńgime órbigen bolatyn.
«Jalpy, mundaı basqosýlar, konferentsııalardyń qajettiligi aıqyn. Óıtkeni, BAQ zańnamasy jetilip otyrýy shart, oǵan túzetýler qajet. Degenmen, munda toqtalatyn másele, ondaı qujatty ázirleý ashyq bolýy shart. Qujat kabınetterde talqylanyp, keıinnen Parlamentte sońǵy núkte qoıylady. Sol úshin de jıynǵa depýtattyq korpýs ókilderin de shaqyryp otyrmyz», - deıdi S. Mataev.
Onyń aıtýyna qaraǵanda, búgingi tańda qoldanystaǵy zańnamada túzetýdi asa qajet etetin 2 bap bar.
«Onyń birinshisi jýrnalısterge salynatyn aıyppuldyń kólemine qatysty. Sońǵy ýaqytta bunyń kólemi sheksiz ósip ketken. 100 mln., 500 mlrd. teńge dep kete beredi. Bul durys emes. Sony birneshe jyl boıy kóterip, aıyppuldyń shamasyn 1 mıllıonnan arttyrmaý kerek dep júrmiz. Ekinshi másele, jýrnalısterdi sotqa berse, ol nege salyq tóleýi kerek?», - deıdi basqarma tóraǵasy.
