BAQ partııalardyń qyzmetin teń jaǵdaılarda jáne salystyrmaly kólemde jarııa etýde - QR OSK

ASTANA. QazAqparat - Buqaralyq aqparat quraldary partııalardyń qyzmetin teń jaǵdaılarda jáne salystyrmaly kólemde jarııa etýde. Bul týraly búgin QR Ortalyq saılaý komıssııasynyń múshesi Lázzat Súleımen málim etti.

«Saılaýǵa qatysýshy partııalardyń barlyǵy ózderiniń qarajat múmkindigine baılanysty belsendi qyzmet atqarýda deýge bolady. Máselen úgit naýqany bastalǵannan beri respýblıkalyq baspa basylymdaryndaǵy saılaýǵa qatysýshy saıası partııalardyń qyzmeti týraly materıaldardyń jalpy aýmaǵynyń 22 paıyz «Nur Otan» partııasynyń qyzmeti týraly bolyp otyr. Al QKHP-nyń qyzmeti týraly materıaldar - 16, «Aq jol» QDP-nyń qyzmeti týraly - 14, «Birlik» SP-nyń qyzmeti týraly - 14, JSDP-nyń qyzmeti týraly - 18, «Aýyl» HDPP-nyń qyzmeti týraly - 16 paıyzdy quraıdy», - dedi ol.

Sonymen qatar QR OSK múshesi 20 aqpannan «Egemen Qazaqstan» jáne «Kazahstanskaıa pravda» gazetterinde saılaýǵa qatysýshy barlyq saıası partııalardyń saılaýaldy baǵdarlamalary jarııalanǵanyn atap ótti.

«Úgit naýqany bastalǵannan beri «Nur Otan» partııasynyń esebinen 590 úgit materıaly,  QKHP-nyń 146 materıaly, «Aq jol» QDP-nyń 166 materıaly, «Birlik» SP-nyń 85 materıaly, JSDP-nyń 46 materıaly, «Aýyl» HDPP-nyń 130 materıaly jarııalandy», - dedi L.Súleımen.

Onyń atap ótýinshe, jalpy, BAQ partııalardyń qyzmetin teń jaǵdaılarda jáne salystyrmaly kólemde jarııa etýde. Partııalardyń buqaralyq aqparat quraldaryna teń qol jetkizý qamtamasyz etilýde, al saılaýshylardyń olardyń baǵdarlamalary, maqsattary jáne is-sharalary týraly tolyq, senimdi jáne jedel aqparatty alýǵa múmkindigi bar.