BAQ ortalyq jáne jergilikti memleket organdarynyń jumysyn aqparattyq turǵyda baqylaýǵa alýy tıis - QR Memlekettik hatshysy

ASTANA. 16 qazan. QazAqparat - Búgin QR Memlekettik hatshysy M.Tájın Úkimettiń 2013 jylǵy 11 qazanda ótken keńeıtilgen otyrysynda Memleket basshysy bergen tapsyrmalardyń oryndalý barysyn aqparattyq turǵyda jarııalap-kórsetý máselesi jóninde respýblıkalyq BAQ basshylarymen keńes ótkizdi.

Bul týraly Aqordanyń baspasóz qyzmetinen habarlandy.

Bas redaktorlarmen birlesip, aqparattyq jumysty uıymdastyrýdyń jáne júrgizýdiń qadamdary talqylandy.

Keńes barysynda Memlekettik hatshy otandyq BAQ ókilderine memlekettiń ekonomıkalyq saıasatynyń strategııalyq baǵyttaryn, jedel sheshýdi qajet etetin ózekti jáne ótkir áleýmettik-ekonomıkalyq máselelerdi jarııalap-kórsetýge nazar aýdarýdy usyndy.

Sondaı-aq, mádenıet, aqparat jáne ıdeologııa salalaryndaǵy memlekettik organdar qyzmeti qaraldy. Memleket basshysy aıtqan syn-eskertpeler men alǵa qoıǵan mindetter aıasynda bul jumysqa ózgerister engizý qajettigi atap ótildi. Іs-sharada áleýmettik-ekonomıkalyq taqyryp boıynsha jýrnalısterdiń arnaýly pýldaryn qurý týraly sheshim qabyldandy. Buǵan qosa, arnaýly reportajdar jasaý arqyly Qazaqstan Prezıdentiniń tapsyrmalaryn oryndaý taqyrybynda memlekettik organdar basshylarynyń brıfıngterin ótkizý júıesi jónindegi aqparattyq materıaldar men jańalyqtardy ázirleý jáne jetkizý formattary jańartyldy.

«Memleket basshysy syn tezine aldy, aıqyn mindetter qoıdy jáne naqty merzimderdi belgilep berdi. Buqaralyq aqparat quraldary ortalyq jáne jergilikti memleket organdarynyń jumysyn aqparattyq turǵyda baqylaýǵa alyp, osy baǵytta ne istelinip jatqany týraly jurtshylyqty jedel habardar etip otyrýǵa tıis», - dep atap ótti Memlekettik hatshy M.Tájın.

Keńes qorytyndysynda memlekettik aqparattyq saıasatqa jaýapty memlekettik organdarǵa Qazaqstan Prezıdentiniń synı eskertpeleri men tapsyrmalaryn iske asyrý aıasynda tıimdi úılestirý jáne BAQ-pen ózara is-qımyldy qamtamasyz etý jóninde naqty mindetter júkteldi.