BAQ: Oraldyń 9 jasar turǵyny inisi men qaryndasy úshin qashyp ketken «kókek» ananyń ornyn basqan
ASTANA. 10 qazan. QazAqparat - 9 jastaǵy Vıacheslav Dozorovtyń erligi tańqaldyrady. Bir aıdan astam ýaqyt ol tórt jastaǵy inisi Valentın men eki jasar qaryndasy Svetlanany ashtyqtan jáne aýrýlardan qorǵap, olarǵa áke de, ana da boldy.
Bul rette ol mektepten de qalmaı, jaqsy baǵalar alyp júrdi.
Bul týraly «Ekspress K» gazetinde shyqqan «Işıte "kýkýshký", mat vashý» atty maqalasynda Vıacheslav Kýlıkov jazdy.
Tatıana Dozorovanyń óz balalaryn tastap ketkenin bir kúni onyń kórshisi baıqap, qalalyq prokýratýraǵa telefon shalady. Qadaǵalaý vedomstvosynyń mobıldik toby qala mańyndaǵy Zachagansk kentindegi atalǵan meken-jaıǵa kelip, kópqabatty úıde tastalǵan balalardy anyqtady. Vıacheslavtyń aıtýynsha, mektepte sabaq bastalǵaly beri ol anasy týraly habarsyz bolǵan.
«Ol bizge uzaq ýaqytqa ketetinin aıtqan joq. Men inim men qaryndasymdy ol joqta jylatpaýǵa tyrystym. Olar bárin túsinedi. Men sabaqqa ketkende, úıde jalǵyz qalyp, shýlamaıtyn», - dep túsindirdi eresek adamsha Vıacheslav prokýratýra qyzmetkerlerine. Dármensiz úsh jas balany aıyqpaıtyn qydyrysqa aýystyrý úshin qandaı tasjúrek ana bolý kerek? Prokýratýra qyzmetkerleriniń estýinshe, Tatıana Dozorova saıajaılarda ózi sııaqty ómirdi baz keshken adamdardyń arasynda ómir súrip, qańǵyryp júr, qazirgi kezde ony polıtseıler izdeýde. Biraq olar kúzgi «kókekti» mundaı áreketi úshin uıattandyrý maqsatynda izdestirýde emes. Balalardyń quqyqtaryn qorǵaý departamentinde ony ana quqyǵynan aıyrý jalǵyz durys sheshim bolady dep esepteıdi. Qazirgi kezde Dozorovtardyń ishindegi eń kenjesi oblystyq balalar aýrýhanasyna jatqyzyldy, munda qyz balaǵa dárigerler kútim jasaýda. Vıacheslav ýaqytsha jasóspirimderdi ońaltý ortalyǵyna jaqyn mektepke baryp júr, al Valentın bolsa bul ortalyqta jadyrap júr.
