BAQ: Ońtústik Koreıaǵa Qazaqstannan baratyn týrısterdiń sany artqan
ASTANA. QazAqparat - 2017 jyldyń alǵashqy 7 aıynda Ońtústik Koreıaǵa Qazaqstannan baryp jatqan týrısterdiń sany jyldyq esep boıynsha 26,8 %-ǵa artqany baıqalyp otyr, dep habarlaıdy Yonhap.
Basylymnyń málimdeýinshe, Ońtústik Koreıanyń týrızmdi damytý agenttigindegiler elge shetelderden kelip jatqan týrısterdiń sany ústimizdegi jyldyń alǵashqy jeti aıynda ósý tendentsııasyn kórsetkenin aıtady. Olar muny el úkimetiniń Qytaıdan keletin týrısterdiń kúrt azaıýyna baılanysty Ońtústik Koreıa týrıstik portfelin dıversıfıkatsııalaýǵa kúsh salýymen túsindirýde.
Koreıa týrıstik uıymynyń (KTU) málimetteri boıynsha bıylǵy qańtar-shildede jyldyq esepte Vetnamnan keletin týrısterdiń sany 29,2 %-ǵa, Qazaqstannan 26,8 %-ǵa jáne Irannan keletinderdiń sany 25,6 %-ǵa artqan. Eldiń týrızm ındýstrııasy Taıaý Shyǵys pen Ońtústik-Shyǵys Azııa elderinen keletin týrısterdi kóbeıtýge kúsh salyp jatqany aıtylady. Ońtústik Koreıadaǵy qytaılyq týrısterdiń sany sońǵy bes aıda azaıa otyryp, shildede 70 paıyzǵa deıin qysqarǵan. Byltyr Ońtústik Koreıadaǵy sheteldik 17 mıllıon týrıstiń shamamen jartysy qytaılyq azamattar bolǵan.
Koreıa týrıstik uıymy shetelden týrıst tartý jumystaryn odan ári jalǵastyratynyn málimdedi. Týrıstik agenttikter de jergilikti turǵyndar arasynda ishki týrızmdi damytý maqsatynda el óńirlerimen yntymaqtastyqty jandandyrýdy josparlap otyr. KTU málimetterine qaraǵanda, qańtar-shilde aılarynda 15 mıllıon ońtústikkoreıalyq shetelge saıahattaýǵa shyqqan, al bul osy kezeńde syrttan kelgen týrısterdiń sanynan eki esege kóp.
