BAQ ókilderi arasynda uıymdastyrylǵan dástúrli BAQ LIGA qysqy maýsymy aıaqtaldy
ASTANA. KAZINFORM - Astanada BAQ ókilderi arasynda uıymdastyrylǵan dástúrli BAQ LIGA qysqy maýsymy máresine jetti. Elimizdiń ártúrli redaktsııalarynan quralǵan jıyrmadan astam komanda eki jarym aıdan astam ýaqyt boıy úzdikterdi anyqtady.
Bıyl BAQ LIGA tuńǵysh ret fýtzal men voleıbol básekelerin qatar ótkizdi. Elordamyzdyń Jaqsylyq Úshkempirov atyndaǵy Jekpe-jek saraıynda uıymdastyrylǵan qysqy maýsymǵa fýtzaldan 12, voleıboldan 9 komanda qatysty.
Jarystyń formaty boıynsha fýtzal komandalary áleýetteri men ótken maýsymdardaǵy oryndaryna sáıkes, eki Lıgaǵa bólindi. «A» lıgasynda «Qazmedıa» komandasy sońǵy týrda basty básekelesi, ártúrli BAQ ókilderinen quralǵan «Qurman» komandasyn jeńip, kezekti ret chempıon atansa, «Qazaqstan» teleradıo korporatsııasynyń «Abai» komandasy úzdik úshtikti túıindedi. Al «V» lıgasynda «Asnews.kz» komandasy bas júldeni qanjyǵalaryna baılap, «Habar» agenttigi ekinshi orynmen kelesi maýsymda «A» lıgasyna joldamany jeńip aldy.
Fýtzalmen qatar ótken voleıbol básekesinde «Atameken business» telearnasyna qarsylas shaq kelgen joq. Fınalda «Habar» agenttigimen kezdesken olar qosymsha sette jeńisti julyp alyp, BAQ LIGA tórt dúrkin chempıony atandy. Úzdik úshtikti jas jýrnalısterden quralǵan «Shanyraq» komandasy túıindedi.
Bıyl BAQ LIGA maýsymyna fýtzal jáne voleıboldan «Qazmedıa» ortalyǵy, «Qazaqparat» agenttigi, Prezıdent teleradıo kesheni, «Atameken business» telearnasy, «Habar» agenttigi, «Qazaqstan» teleradıo korporatsııasy, «Egemen Qazaqstan» gazeti, «Elorda aqparat» agenttigi, «Sadaq media» agenttigi, «Beksport», «QRnews», «ASnews» jáne «Atyrau», «Turki tilmash», «Dodager», «Shanyraq», «Qurman» qurama komandalary qatysty.
Aıta keteıik, baıraǵyn 2016 jyldyń 10 jeltoqsanynda jelbiretken BAQ liga – Qazaqstan BAQ ókilderiniń basyn biriktirip, redaktsııalar arasynda kópir ornatyp, áriptestik tatýlyqty arttyrýǵa baǵyttalǵan joba. Búginde BAQ liga Qazaqstan Mass-medıasy arasynda fýtbol jáne voleıbol dodalaryn ótkizip keldi. Osy ýaqytqa deıin BAQ ókilderi arasynda shaǵyn fýtboldan 17 maýsym, voleıboldan 7 chempıonat jáne komandalyq shahmat básekesi men ústel tennısinen birinshilik ótip, oǵan elimizdiń 100-den astam Buqaralyq aqparat quraldary redaktsııalarynan 1 000 shamasynda jýrnalıster qatysty. BAQ liga brendimen BAQ ókilderi arasyndaǵy shaǵyn fýtbol birinshilikteri elordamyzdan bólek, Almaty, Taldyqorǵan jáne Aqtaý syndy qalalarda da uıymdastyryldy.
Sondaı-aq semserlesýden Astanadaǵy álem kýbogyna 46 elden 500-ge jýyq sportshy qatysyp jatyr.
