BAQ ókilderi arasynda «Taza Qazaqstan – Taza Astana» baıqaýy jarııalandy

ASTANA. KAZINFORM — BAQ ókilderi arasynda elorda kúnine oraı «Taza Qazaqstan – Taza Astana» baıqaýy jarııalandy, dep habarlaıdy elorda ákimdiginiń resmı saıty.

«Astana Tazalyq» JShS BAQ ókilderi men blogerler arasynda baıqaý jarııalaıdy. Jalpy júlde qory 4 mıllıon teńgeni quraıdy.

«Taza Qazaqstan – Taza Astana» baıqaýy respýblıkalyq «Taza Qazaqstan» ekologııalyq aktsııasy men Astana kúnine oraı uıymdastyrylady.

Baıqaýdyń maqsaty – Memlekettik «Taza Qazaqstan» ekobaǵdarlamasy aıasynda Astana qalasynyń, onyń mańyndaǵy eldi mekenderdiń sanıtarlyq jaǵdaıyn qamtamasyz etý, qoqys jınaý jáne shyǵarý (kóshelerdi, joldardy, alańdardy, trotýarlardy, júretin joldardy jáne basqa da qoǵamdyq oryndardy qolmen jáne mehanıkalandyryp tazalaý); «Astana Tazalyq» qyzmetiniń qalyptasýy, damýy, jetistikteri men keleshegi týraly aıtý, sondaı-aq, qalada kún saıyn tazalyq pen tártipti qamtamasyz etetin, Jumysshy mamandyqtar jyly aıasynda kásiporyn qyzmetkerlerine erekshe nazar aýdarý qajet.

Baıqaýǵa qazaqstandyq buqaralyq aqparat quraldarynyń jýrnalısteri men blogerler qatysa alady.

Baıqaý kelesi nomınatsııalar boıynsha ótkiziledi:

1) «Úzdik televızııalyq materıal»;
2) «Áleýmettik jelilerdegi úzdik jarııalanym»;
3) «Baspa basylymyndaǵy úzdik maqala»;
4) «Internet-basylymdaǵy úzdik jarııalanym».

Baıqaýǵa 2025 jylǵy 15 mamyr men 30 maýsym aralyǵynda memlekettik nemese orys tilinde shyqqan jumystar qabyldanady. Baıqaýǵa usynylatyn jumystar sany shektelmegen.

Jumystardy táýelsiz komıssııa baǵalaıdy. Komıssııa quramyna kommýnaldyq sala mamandary men tájirıbeli jýrnalıster kiredi. Qazylar alqasy tómendegi krıterıılerge súıene otyryp baǵalaıdy:

1) berilgen taqyryptyń ózektiligi jáne sáıkestigi;
2) taqyrypty ashý tereńdigi jáne usynylǵan aqparattyń shynaıylyǵy;
3) baıandaý stıli;
4) avtorlyq paıymnyń biregeıligi.

Baıqaýǵa qatysý úshin materıaldar kelesi elektrondy poshta arqyly qabyldanady: [e-mail]. Baılanys nómiri: [phone].

Jumystardy qabyldaý ýaqyty: 2025 jylǵy 30 maýsym, saǵat 18:00-ge deıin (Astana ýaqytymen).

Baıqaý qorytyndysy 2025 jylǵy 3-4 shilde aralyǵynda jarııalanady.

Aıta keteıik, Prezıdent Teleradıokesheni qyzmetkerleri «Taza Qazaqstan» aktsııasyna qatysty.