BAQ ókilderi arasynda kezekti baıqaý jarııalandy
ASTANA. QazAqparat - «KEGOC» AQ baspasóz, elektrondy jáne Internet-BAQ jýrnalısteri arasynda kompanııanyń 20 jyldaǵy qyzmet nátıjeleri men Qazaqstan ulttyq elektr energetıkalyq torabyn damytýdyń mańyzdy máseleleri taqyrybyndaǵy eń úzdik jarııalanymdarǵa shyǵarmashylyq baıqaý ótkizedi, dep habarlaıdy QazAqparat.
Atalǵan baıqaý 2003 jyldan bastap jyl saıyn ótkizilip turady. Bul BAQ nazaryn elektr energetıkasy salasynyń damýyna, jaǵymdy ózgeristerge, elimizdiń elektr energetıkasynda bolyp jatqan oqıǵalarǵa, sondaı-aq kompanııanyń qazirgi jáne keleshektegi ınvestıtsııalyq jobalaryna aqparattyq qoldaý kórsetý máselelerine aýdarýǵa baǵyttalǵan. Baıqaýǵa qatysý úshin otandyq baspasóz, elektrondy jáne Internet-BAQ-ta 2017 jylǵy 1 qańtardan 10 jeltoqsanǵa deıingi aralyqta jaryq kórgen materıaldar qabyldanady.
Úmitkerler 2017 jyldyń 2 jeltoqsanyna deıin ótinim formasyn toltyryp, óz jumystaryn (jarııalanǵan materıaldyń kóshirme nusqasyn jáne/nemese materıaldyń aýdıo-vıdeo jazbasyn) pressa@kegoc.kz, zhakeyeva@kegoc.kz, bayazitova@kegoc.kz elektrondy meken-jaıyna, sondaı-aq 010000, Astana qalasy, Almaty aýdany, Táýelsizdik dańǵyly, 59, «KEGOC» AQ Memlekettik qurylymdarmen ózara árekettestik jáne kommýnıkatsııalar departamentiniń meken-jaıyna «BAQ baıqaýyna ótinim» degen belgimen baspasóz jáne elektrondy nusqasyn jibere alady.
Baıqaý biliktilik talaptarynsyz bir kezeńde ótkiziledi. Baıqaý komıssııasy tirkelgen qatysýshylardyń arasynan 10 atalym boıynsha jeńimpazdardy anyqtaıdy. Shyǵarmashylyq jumystar kásibı sheberlik, materıaldyń ózektiligi, janr sáıkestigi, buqaraǵa qoljetimdiligi jáne baıandalýy uǵynyqty bolý krıterııleri boıynsha baǵalanady. Baıqaýdyń qorytyndylary 2017 jylǵy 31 jeltoqsanǵa deıin shyǵarylady.
