BAQ Mıýnhendegi qarýly shabýyldyń sebebin anyqtady
ASTANA. QazAqparat - Mıýnhendegi «Olımpııa» iri saýda ortalyǵy mańynda adamdarǵa qarýly shabýyl jasaǵan jigit ony mektep kezinde mazaq qylǵan synyptastarynan ósh almaq bolǵan, dep jazady Lenta.rý.
Daily Mail habarlaǵandaı, ınternetke belgisiz adam shabýyl jasaǵan jigitti burynnan biletindigin aıtyp habarlama qaldyrǵan.
«Men ol jigitti tanımyn. Onyń esimi - Álı Sonbolı. Ol bizdiń synypta oqıtyn, biz ylǵı da ony mazaq etetinbiz. Ol bizdi bir kúnderi óltiretinin aıtyp júretin», - dep jazbany keltiredi basylym.
Senbi kúni germanııalyq Bildo basylymy atys uıymdastyrǵan jigittiń sýretin jarııalady. Belgili bolǵandaı, onyń esimi Davıd Sonbolı, ıran týmasy, jasy 18-de. Sondaı-aq basylym ol ósh almaq bolǵan dep habarlaǵan.
Eske sala keteıik, 22 shilde kúni keshki ýaqytta Mıýnhendegi «Olımpııa» saýda úıi mańynda belgisiz bireý oq jaýdyryp, 10 adam qaza tapty. Onyń ishinde atysty uıymdastyrǵan jigit te bar.
Sońǵy málimet boıynsha, 27 adam jaraqat alǵan, onyń ony aýyr halde jatyr.
