BAQ: Máskeý men Mınsk gazdyń jańa baǵasy jóninde kelisimge keldi
ASTANA. QazAqparat - Reseı men Belarýs reseılik gazdyń jańa baǵasyn qurý shemasy týraly aldyn ala kelisti. Osylaısha, Mınsk úshin gazdyń myń sharshy metri 132 dollardan 100 dollarǵa deıin arzandaıdy, al dollarlyq esepteý formýlasy rýblge aýysady, dep jazdy "Kommersant" gazeti.
«Gazpromnyń» málimdeýinshe, kelisimshart ázirshe jasalǵan joq.
Shilde aıynda Reseı energetıka mınıstri Aleksandr Novak Belarýs qaryzynyń 270 mıllıon dollarǵa jetkenin habarlady. Óz kezeginde Mınsk qaryzdy moıyndaýdan bas tartyp, myń sharshy metri 132,77 dollar bolǵan gaz baǵasynyń ádiletsizdigin aıtqan edi. Reseılik tarap túsinispeýshilikter sheshilgenshe, bereshek qaryzdyń kelisimshartta kórsetilgen baǵamen tólenýin talap etti.
Kelesi jyldan bastap, Belarýs úshin gazdyń baǵasy Reseıdiń biryńǵaı gazben jabdyqtaý júıesi boıynsha, joǵary koeffıtsıentke kóbeıtilgen ortasha baǵada anyqtalady. 2017 jyl úshin gazdyń ortasha baǵasy myń kýbometrine shamamen 4,05 myń rýbl, al koeffıtsıent shamamen 1,48 boldy, - dep jazdy RIA Novostı.
Eger jańa sharttar bekitilse, Belarýs «Gazprom» aldyndaǵy qaryzyn eski baǵamen óteı alady, al Máskeý túsinispeýshilik kezinde tyıym salynǵan elge munaı jetkizýdi qaıtadan qolǵa alady.
