BAQ: M.Shýmaher komadan múldem shyqpaýy múmkin
ASTANA. 3 qańtar. QazAqparat - «Formýla-1»-diń jeti dúrkin chempıony Mıhael Shýmaher eshqashan komadan shyqpaýy múmkin, deıdi ony emdeýshi dárigerler.
Qazir sportshynyń jaǵdaıy turaqty bolǵanmen, aýyr halde.
Tanymal sportshy osyndaı qaıǵyly jaǵdaıǵa 2013 jyldyń 29 jeltoqsanynda Frantsııada Alpi taýlarynda ushyraǵan bolatyn.
Taıaýda bolǵan jaǵdaıdyń mán-jaıy belgili boldy. Belgili bolǵandaı, M.Shýmaher omby qarǵa qulap ketken dosynyń qyzyna kómektesemin dep tómenge túsken. Arnaıy jol boıynan shyǵyp ketken qyz balany aıaǵyna qoıyp, qaıta qozǵalǵan kezde qar astyndaǵy tastarǵa soǵylǵan, dep habarlaıdy RBK.
