BAQ qyzmetkerleri «Teatr jáne aqparat» júldesimen marapattaldy
ALMATY. 28 naýryz. QazAqparat /Erlik Erjanuly/ - Búgin Almatyda KSRO Halyq artısi, Memlekettik syılyqtardyń laýreaty Ydyrys Noǵaıbaevtyń 80 jyldyǵyna arnalǵan «Teatr kóktemi - 2011» festıvaliniń jabylý saltanaty ótti.
Onda Qazaqtyń memlekettik Muhtar Áýezov atyndaǵy akademııalyq drama teatrynyń dırektory jáne kórkemdik jetekshisi Esmuqan Obaev «Teatr kóktemi - 2011» festıvalin jáne teatrdyń bir jyldyq jumysyn nasıhattaǵany úshin bir top buqaralyq aqparat qyzmetkerlerin «Teatr jáne aqparat» júldesimen marapattady. Halyqaralyq teatr kúni mundaı joǵary mártebege bıyl «Mádenıet» jýrnalynyń tilshisi Aqmonshaq Aqmet, «Vechernyı Almaty» gazetiniń tilshisi Indıra Sátbaeva, «Túrkistan» gazetiniń tilshisi Gúlzına Bektasova, «Almaty aqshamy» gazetiniń mádenıet bóliminiń meńgerýshisi Ótesh Qyrǵyzbaı, «Qazaqstan» telearnasynyń tilshisi Jazıra Elshibek jáne «Habar» telearnasynyń prodıýseri Qymbat Dosjan ıe boldy.
