BAQ: Kýbada apatqa ushyraǵan ushaq jolaýshylarynyń barlyǵy qaza boldy
ASTANA. QazAqparat - Senbi kúni Kýbada An-26 jolaýshylar ushaǵy apatqa ushyrady.
CiberCuba ınternet-portalynyń málimetinshe, bortta bolǵan adamdardyń barlyǵy qaza boldy.
TASS agenttigi NTN24 telearnasyna silteme jasap habarlaýynsha, Barakoa qalasynan ushyp shyqqan Aerogaviota kýbalyq áýe kompanııasynyń ushaǵy araldyń batys bóliginde ornalasqan Pınar-del-Rıo qalasy aýmaǵynda radardan joǵalyp ketti.
Aerogaviota avıakompanııasy ushaqtyń apatqa ushyraǵanyn rastady. Sheteldik BAQ-tardyń biri áýe kóliginde 39 adam bolǵandyǵyn jáne 8 adamnyń qaza bolǵanyn habarlasa, CiberCuba portaly oqıǵa saldarynan tiri qalǵandar joqtyǵyn jazýda.
Portaldyń habarlaýynsha, ishki reısti júzege asyrmaq bolǵan ushaqtyń synyqtary Gavanadan batysqa qaraı 80 shaqyrym jerde, Las-Lomas-de-San-Krıstobal atalatyn týrıstik aımaqtan tabyldy. Ushaq bortynda kimderdiń bolǵany belgisiz.
Kýbanyń resmı bıligi oqıǵaǵa qatysty ázirge eshqandaı aqparat taratpady.
