BAQ: Qorǵas «Qytaıdyń batysyndaǵy Ýoll-Strıtke» aınalady

ASTANA. QazAqparat - Qazaqstan men Qytaı shekarasyndaǵy Qorǵasta jýyrda Jańa Jibek jolyndaǵy qarjy «aýylynyń» saltanatty ashylý rásimi ótti. Oǵan qalanyń halyqaralyq qarjy ortalyǵyna aınalýyna jaǵdaı jasaıdy degen úmit artylyp otyr, dep jazady Sınhýa.

Ádette qarjy ınnovatsııalary jáne ofshor bank operatsııalary júrgiziletin pılottyq aımaqtar Beıjiń, Shanhaı, Gýanchjoý, Shenchjen sekildi Qytaıdyń iri qalalarynda jumys isteıdi. Qorǵas eldiń shekaralyq aımaǵyndaǵy osyndaı statýs alǵan alǵashqy qala atandy.

Qorǵasta qarjy «aýylynyń» qurylýy, mamandardyń pikirinshe, onyń tamasha geogorafııalyq múmkindikterine baılanysty. Budan tys, Qytaı úkimeti osy qalaǵa qatysty túrli salalarda jeńildikter berý saıasatyn ustanady.

2012 jyly qurylǵan «Qorǵas» halyqaralyq shekaralyq yntymaqtastyq ortalyǵy eldiń jalǵyz shekaralyq yntymaqtastyq ortalyǵy bolyp tabylady.

2013 jyldyń tamyzynda ortalyqta ıýanmen júrgiziletin ınnovatsııalyq ofshor operatsııalaryn keńeıtý jónindegi tájirıbe jobasy bastalǵan edi.

Keıin 2016 jylǵy qyrkúıekte Qytaıdyń Halyq banki osy jobanyń odan ári iske asyrylýy týraly málimdegen. Jobaǵa sáıkes, ıýanmen júrgiziletin ınnovatsııalyq ofshor operatsııa qyzmetteri, negizinen, Qytaı tarapynan ákimshilik komıtette tirkelgen kásiporyndarǵa jáne sheteldik bank mekemelerine, kásiporyndarǵa, jeke tulǵalarǵa usynylady.