BAQ: Qazaqstanda un tapshylyǵy bolýy múmkin

Telearnanyń habarlaýynsha, Qazaqstanda benzınniń sońyn ala nannyń da baǵasy sharyqtap ketýi múmkin. Óıtkeni OQO-daǵy un óndiretin iri zaýyttar birer kúnniń ishinde jumystaryn toqtatpaq. Basty sebep, astyqtyń der kezinde jetkizilmeýi. Al qambadaǵy qor taýsylýǵa shaq qalǵan.

Bıyl Soltústik Qazaqstan oblysynda bıdaı jetkilikti mólsherde jınalǵan. Tek ony tasymaldaıtyn vagon joq. Saldarynan óńirdegi un shyǵarýmen aınalysatyn 50-ge tarta kásiporyn taıaýda jumysyn toqtatýy múmkin. Tyǵyryqqa tirelgen kásiporyn qojaıyndary bul problemany sheshýge Úkimettiń aralasýyn surap, dabyl qaqty. «Qazir zaýyttar qordaǵy sońǵy bıdaıdy óńdep jatyr. Onyń ózi bir-eki kúnge ǵana jeterlik. Al shıkizattyń jaqyn arada jetkizilýi ekitalaı. Óıtkeni, vagondardyń barlyǵy Reseıde», - deıdi kásipkerler.

Bul máseleni ár zaýyt óz betinshe sheshýge árekettenip kórgen. Biraq, nátıje shyqpaǵan.

Oblystaǵy eń iri kompanııalardyń biri «Altyn Dánniń» ózi tasymal máselesinen qıyndyq kórýde. Atalǵan zaýyt táýligine shamamen 15 vagon shıkizatty qajet etedi. Al bıdaıdy jetkizip berýi tıis «Astyq-Trans» ázirge tek ýáde berýmen shektelip keledi. Vagondardyń naqty qaı kúni bosaıtynyn dóp basyp aıta almaýda. Onymen qosa, eki aıdan beri tapsyrys qabyldaýdy doǵarǵan.

Mamandardyń aıtýynsha, jaǵdaı jónge kelmese qambadaǵy bıdaı shirip ketýi múmkin.

«Dıqandar ónimin sata almaı otyr. Óıtkeni biz ala almaı otyrmyz. Bul máseleni tipti úlken kompanııalar da sheshe almaýda. Sebebi vagon joq», - deıdi «Altyn Dán» JShS basshysy Baharam Ábdikárimov.

Bıznesmenderdi tyǵyryqqa tiregen  «Astyq- Trans» Qazaqstandaǵy bıdaı tasymaldaıtyn jalǵyz kompanııa. Onyń ózi qazir Reseı Federatsııasynyń menshigine ótip ketken.  

«Halyqqa aılyq tóleýimiz kerek, salyq tóleýimiz kerek. Munyń barlyǵy toqtaıdy. Sebebi zaýyt toqtaıdy», - deıdi Baharam Ábdikárimov.

Túıitkildi oblys deńgeıinde sheshý múmkin emestigin aıtqan kásipkerler buǵan úkimettiń aralasýyn surap otyr.