BAQ: Izraıl parlamenti ásker shyǵynyna qosymsha $9 mlrd bólýdi maquldady

ASTANA. KAZINFORM – Izraıl Parlamenti áskerı shyǵyndarǵa qosymsha 31 mlrd shekel (9 mlrd dollardan astam) bólý týraly zań jobasyn maquldady, dep habarlaıdy Anadoly.

Izraıldiń Calcalist basylymynyń habarlaýynsha, Knesset (parlament) alǵashqy daýys berý kezinde 30,8 mıllıard shekeldi (shamamen 9,23 mıllıard dollar) quraıtyn qosymsha bıýdjetti maquldady. Bul qarajat negizinen eldiń qaýipsizdik qajettilikterine baǵyttalady.

120 depýtattyń ishinde 42-si qoldap, 37-si qarsy daýys bergen. Zań kúshine enýi úshin ol ekinshi jáne úshinshi oqylymda da maquldanýy qajet.

Daýys berý arnaıy plenarlyq otyrysta ótti.

Ol Úkimet pen premer-mınıstr Bınıamın Netanıahýdyń haredım ókilderin (din ókilderi) áskerden bosatýdy zańdastyrý týraly ýádesin oryndamaǵany úshin narazylyq retinde shilde aıynda koalıtsııadan ketip qalǵan eki ýltraortodoksaldy partııa arasyndaǵy saıası kelisim aıasynda ótti.

Kelisimge sáıkes, «Tora birligi» partııasy (7 mandat) daýys berýge qatysqan joq, al «ShAS» partııasy (11 mandat) zań jobasyn qoldady. Sonymen qatar, osy kelisim aıasynda Din isteri mınıstrligine 80 mıllıon shekel (shamamen 24 mıllıon dollar) bólý qarastyrylǵan.

Yedioth Ahronoth basylymy atap ótkendeı, qorǵanys bıýdjetin ulǵaıtý qajettiligi kútpegen shyǵyndarǵa, sonyń ishinde 2025 jyldyń 13–24 maýsymy aralyǵynda Iranǵa qarsy áskerı áreketterge jáne Izraıl armııasynyń aýqymdy satyp alýlaryna baılanysty bolǵan.

Osyǵan deıin Izraıl Doha shabýyly úshin jaýapkershilikti tolyq óz moınyna alǵany týraly jazdyq.