BAQ: ıslamshylar munaı satyp, kúnine mıllıon dollardan tabys tabýda

Bul týraly reseılik «Jańalyqtar» agenttigi The Telegraph-qa silteme jasap habarlaıdy. Basylymnyń málimetterinshe, olardan munaıdy Túrkııa men Iran satyp alýda. Sarapshylar buryn «Irak jáne Levanta Islam memleketi» retinde belgili toptyń sodyrlary munaıdy óte arzan baǵamen - barrelin 25 dollarǵa satýda dep paıymdaıdy. Lańkesterdiń munaı mámilesiniń ortalyǵy Irak Kúrdistanynyń shekarasyna ornalasqan Týz-Hýrmatý qalasy bolyp otyr.

Iraktyń munaı ındýstrııasy jónindegi mamany Shvan Zýlal sodyrlar ózderi basyp alǵan 240 sharshy shaqyrym aýmaqtaǵy negizgi kenishterdiń munaıyn paıdalanýda dep málimdedi. Atap aıtqanda, ıslamshylar Baıdjı qalasyndaǵy iri munaı óńdeý zaýyty men Kırkýk-Djeıhan munaı qubyrynyń bir bóligine baqylaý jasaýda. Taǵy bir sarapshy - Maplecroft kompanııasynyń taldamashysy Djordan Perrıdiń aıtýynsha, «Irak jáne Levanta ıslam memleketiniń» (ILIM) sodyrlary eger de shynynda kúnine mıllıon dollar tabys taýyp otyrsa, bul olardyń kirister aǵynyna baqylaý jasap otyrǵanyn bildiredi, onyń kómegimen qarýlar satyp ala alady jáne jergilikti áskerıler men sheıhtardyń yqylasyna bólenedi.

Iraktaǵy daǵdarys maýsymnyń basynda ýshyqty. «Sońǵy kezderge deıin Sırııada soǵysqan ILIM tobynyń sodyrlary maýsym aıynda Iraktyń soltústik jáne batys aýdandaryna shabýylǵa basshylyq etti. Olarǵa Irak súnnıtteri, Saddam Hýseın armııasynyń áskerıleri jáne usaq lańkestik toptar qosyldy. Sońǵy apta ishinde ILIM Iraktyń birneshe qalasyn jáne Sırııa men Iordanııa shekarasyndaǵy aýmaqty basyp aldy. Bul top 29 maýsymda ózderiniń baqylaýyndaǵy Irak pen Sırııa aýmaqtarynda ıslam halıfaty qurylǵanyn jarııalady. Onyń halıfy bolyp sodyrlar kóshbasshysy Abdalla Ibragım as-Samaraı jarııalandy, ol Ábý Bákir ál-Baǵdadı retinde de tanymal. Al toptyń ózi ataýyn «Islam memleketi» dep ózgertti. Ózin-ózi jarııalaǵan halıfat qazirde Sırııanyń soltústigindegi Aleppo qalasynan Iraktyń shyǵysyndaǵy Dııala provıntsııasyna deıin sozylyp jatyr.