BAQ Gúlnar Karımovanyń ýlanyp, qaza tapqanyn habarlady
ASTANA. QazAqparat - Ózbekstannyń tuńǵysh Prezıdenti Islam Karımovtyń úlken qyzy - Gúlnar Karımova ýlanyp, qaza tapty, dep habarlady 22 qarasha kúni "Tsentr-1" saıty Ózbekstannyń Ulttyq qaýipsizdik qyzmetiniń qyzmetkerine silteme jasap.
Jýrnalısterdiń málimdeýinshe, 5 qarasha kúni 44 jastaǵy áıel ýlanyp, kóz jumǵan. Sol túni ol Tashkenttegi "Mınor" zıratyna jerlengen, al onyń qabirin jermen birge tegistep jibergen, dep aıtylady maqalada.
Esterińizge sala keteıik, Ózbekstan Prezıdenti Islam Karımovtyń úlken qyzy buryn Syrtqy ister mınıstrliginde, sondaı-aq Gúlnar Karımova birneshe jyl BUU jáne Ispanııada eńbek etti. Odan bólek, zergerlik buıym dızaınymen aınalysty, "Gýgýsha" shyǵarmashylyq laqap atymen sahnada óner kórsetken. Gúlnar Karımova 2013 jyldyń kúzine deıin belgili kásipker atandy. Telearnalar, radıo stansalar men sándi kıim úlgileri onyń qol astynda bolǵan. Al, BAQ ony Ortalyq Azııadaǵy bedeldi áıelderdiń biri dep atady. Alaıda, jýrnalısterdiń málimetterinshe, Karımova 2013 jyly qarashada ákesiniń qaharyna ushyrap, bir sátte barlyǵynan aıyryldy.
BAQ-tyń atap ótýinshe, 2 qyrkúıekte Islam Karımovtyń óliminen keıin Gúlnar men onyń balalary Samarqandtaǵy jerleý rásimine qatyspaǵan. BAQ eldiń bolashaq kóshbasshysy Shavkat Mırzıeevtyń el parlamentinde Karımovtar áýletine kóńil aıtqanda Gúlnardyń esimin atamaı, tek onyń ápkesi Lolany atap ótkenin baıqaǵan.
