BAQ: Germanııalyq mýzykalyq toptyń Qazaqstanǵa jasaǵan saparlary «Sálem, Qazaqstan!» atty ánin shyǵarýǵa yqpal etti
ASTANA. 6 naýryz. QazAqparat - Qazaqstan Respýblıkasynyń Prezıdenti Nursultan Nazarbaevtyń atyna Germanııa turǵyny, «Korol Lır» mýzykalyq tobynyń múshesi Vıktor Ýngefýgten hat keldi,
dep jazady «Egemen Qazaqstan» gazeti.
Hatynda avtor arada jıyrma jyl ótkennen keıin Qazaqstanǵa jasaǵan saparynan alǵan óz áserin bólisedi. «Bizdiń Germanııaǵa Qazaqstannan kóship kelgenimizge 20 jyldan astam ýaqyt ótipti. Ol kezde biz 17-18 jasta edik. 2011 jyly biz týǵan jerimiz - Qazaqstanǵa kelip, balalyq shaǵymyz ótken jerlerde boldyq», - delingen hatta.
V. Ýngefýg Qazaqstanǵa jasaǵan saparlary mýzykalyq toptyń «Sálem, Qazaqstan!» atty ánin shyǵarýǵa yqpal etkenin atap ótken.
Hat avtory Memleket basshysynyń Qazaqstan halqynyń ıgiligi jolynda atqaryp jatqan qyzmetine tabys tilegen.
