BAQ betterinde óz-ózine qol jumsaý tásilderin jarııalaýǵa jol bermeý kerek - Bilim jáne ǵylym mınıstrligi
ASTANA. 24 maýsym. QazAqparat /Qanat Mámetqazyuly/ - Bilim jáne ǵylym mınıstrligi BAQ betterinde óz-ózine qol jumsaý tásilderin jarııalaýǵa eshqandaı jol berilmeýi kerek dep sanaıdy.
Bul týraly búgin Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy barysynda Bilim jáne ǵylym vıtse-mınıstri Serik Yrsalıev málim etti.
«Belgili psıholog Robert Chaldını kámeletke tolmaǵandar arasynda óz- ózine qol jumsaýǵa áser etetin eń myqty psıhologııalyq prıntsıpterdiń biri retinde eliktý, uqsaýǵa tyrysý prıntsıpin aıtady. Eń soraqysy Internette, merzimdi baspasózderde óz-ózine qol jumsaý ádisteriniń barlyǵy táptishtep beınelenip, uǵynyqty baıandalyp jazylady. Al balalar bundaıdy oqyp otyryp, eliktep, aqyr aıaǵy ólimge soǵyp jatatyn jaıttardyń basym bóligin qoldanýǵa bolatyn nusqaýlyq sekildi de qabyldaı beredi», - deıdi S.Yrsalıev. Onyń aıtýynsha, kámeletke tolmaǵandar arasyndaǵy sýıtsıd problemasymen múddeli memlekettik organdar ǵana aınalyspaýlary tıis. «Sondyqtan da, problemanyń ótkirligin, mańyzdylyǵyn eskere kele, barlyq qoǵamdyq ınstıtýttardyń, onyń ishinde buqaralyq aqparat quraldarynyń kúsh-jigerin jumyldyra paıdalanǵan lázim», - deıdi S. Yrsalıev.
