BAQ: Belarýsta 2016 jyly alǵashqy ólim jazasy kesildi
ASTANA. QazAqparat - Belarýsta ózimen birge turatyn áıeldi asa qatigezdikpen óltirgen er adamǵa 2016 jyly alǵashqy ólim jazasy úkimi shyǵaryldy, dep habarlady RIA Novostı jergilikti BAQ-qa silteme jasap.
Vıleıkı turǵynyna ólim jazasyn Mınsk oblystyq soty shyǵardy. Ol buryn da ólimge ákep soqqan aýyr dene jaraqatyn salǵany úshin sottalǵan bolatyn. KSRO kezinde oǵan adam óltirgeni úshin atýǵa úkim shyǵarylǵan bolatyn, alaıda úkimdi joǵarǵy ınstantsııa buzdy. Tıisti merzimin ótegennen keıin ol bostandyqqa shyqty.
Osy jolǵy úkim áli kúshine engen joq, oǵan shaǵym berilýi de múmkin, dep atap ótilgen habarlamalarda.
Belarýs ólim jazasy qoldanylatyn Eýropadaǵy jalǵyz el. 1996 jyly ólim jazasyn alyp tastaý máselesi Belarýste jalpyhalyqtyq referendým talqysyna salyndy. Sol kezde osy jazanyń saqtalýyn qoldap, referendýmǵa qatysqandardyń 80,5%-ǵa jýyǵy daýys berdi. Ólim jazasynyń bolýy Belarýstiń Eýropa Keńesi Parlamenttik Assambleıasyna arnaıy shaqyrylǵan mártebesin alýyna kedergi keltirýde.
Respýblıka Bas prokýratýrasynyń resmı málimetteri boıynsha, 2009 jáne 2010 jyldary eki-ekiden, 2011 jyly - úsh, 2013 jyly - tórt ólim jazasy úkimi shyǵarylǵan, 2012 jáne 2014 jyldary mundaı úkim bolǵan joq. 2015 jyly eki ólim jazasy taǵaıyndalǵan.
