BAQ barlyq úderisterdiń tıimdiligin arttyrady
ASTANA. 25 maýsym. QazAqparat - Qazaqstan jýrnalısteriniń kásibı merekesi qarsańynda Bas redaktorlar klýbynda Qazaqstan Respýblıkasy Bilim jáne ǵylym mınıstri Baqytjan Jumaǵulov aldyńǵy qatarly otandyq BAQ basshylarymen kezdesý ótkizdi,
dep habarlaıdy QR Bilim jáne ǵylym mınıstrliginiń baspasóz qyzmeti.
Kezdesý Bilim jáne ǵylym mınıstriniń bastamasymen uıymdastyryldy.
Mınıstr bilim berý jáne ǵylym salasynda júzege asyrylyp jatqan is-sharalar týraly tolyq málimet berip ótti. Bıyl 2010-2020 jyldarǵa arnalǵan memlekettik bilim berýdi damytý baǵdarlamasy bastaldy. Bekitilgen is-sharalar josparyna saı baǵdarlamany júzege asyrý úderisi belsendi júrip jatyr.
«Búgingi tańda Qazaqstanda Memleket basshysynyń basshylyǵymen bilim berý jáne ǵylym salasyn aýmaqty túrde qaıta jańǵyrtý jumystary júrgizilip jatyr. Jáne de bul iste BAQ erekshe ról atqarady. BAQ-tyń qoldaýy arqyly ǵana bul qaıta qurastyrý jumystary keń taralyp, nátıjesin beredi», - dep atap ótti Bilim jáne ǵylym mınıstri.
Ashyq órbigen áńgime jýrnalıster qaýymynyń kóńilinen shyqty. Olar mınıstrge mektep, kásibı tehnıkalyq bilim berý, joǵary bilim berý, ǵylym salalaryndaǵy túıitkildi máseleler boıynsha óz saýaldaryn qoıdy.
«Memlekettik organ basshylarynyń qatysýymen ótetin osyndaı kezdesýler biz úshin tıimdi. Osyndaı kezdesýler Klýbymyzda dástúrge aınalady dep oılaımyn», - dedi Bas redaktorlar kýlybynyń prezıdenti Bolat Erejepov.
Kezdesý merekemen aıaqtaldy. Baqytjan Jumaǵulov elimizdiń aldyńǵy qatarly jýrnalısterin kásibı merekelerimen quttyqtaı kele, QR Bilim jáne ǵylym mınıstrliginiń alǵys hattaryn tabys etti.
