BAQ arasynda ótken alǵashqy «SPORTINFORM CUP» týrnırinde «HABAR» telarnasy jeńiske jetti
Týrnırdiń ashylý saltanatyna Astana fýtbol federatsııasynyń prezıdenti Málik Hasenov qatysty.
«Cportqa beıim jýrnalıster - fýtboldy súıetin jandar. Jaqynda ǵana BAQ ókilderi arasynda ótken halyqaralyq týrnırge baryp qaıttym. Biz de qazaqstandyq jýrnalısterdiń arasynda dál osyndaı sharalardy jıirek ótkizýdi josparlap otyrmyz. Sizderdiń fýtbolǵa degen qyzyǵýshylyqtaryńyzdy baıqadym, sol sebepti bul oıyn túriniń damýyna barynsha atsalysýǵa tyrysamyz. Biz baılanys ornatýǵa árdaıym ázirmiz. Sondaı-aq, áýesqoı týrnırlerdiń sany jyldan jylǵa artyp kele jatqanyna qýanamyz. Barlyq qatysýshylarǵa ádil oıyn tileımin! Myqtynyń myqtysy jeńetinine senemin», - dedi M. Hasenov.
Matchtyń birinshi jartylaı fınalynda «SPORTINFORM» SAA jáne «QazAqparat» HAA komandalary kezdesti. Saıysta Halyqaralyq aqparat agenttiginiń oıynshylary basymdyq tanytyp, 4:2 esebimen jeńdi.
Dál osyndaı kórsetkishpen «Habar» jáne «QAZSPORT» komandalary arasyndaǵy ekinshi jartylaı fınal aıaqtaldy. Eldiń basty sport arnasynyń ókilderi Turlyjan Áıtenov men Ázız Jumadil salǵan eki golǵa «habarlyq» Beknur Nurmaǵambet, Dinmuhamed Múkeı jáne Nursultan Qabylbek 4 golmen jaýap qaıtardy.
Úshinshi oryn úshin ótken matchta «QAZSPORT» telearnasy men «SPORTINFORM» SAA komandary synǵa tústi. Matchtyń alǵashqy golyn sport agenttiginiń oıynshylary salǵanymen, «Qazsport» komandasy joǵalqan upaıdyń ornyn jyldam toltyrdy. Degenmen, agenttiktiń oıynshylary 5:2 esebimen jeńiske jetti.
Fınal shıeleniske toly boldy.Oıynnyń bas jaǵynda «Habar» telearnasy osaldyq tanytqanymen, sońyna qaraı esepti 4:3-ke jetkizip, jeńiske jetti.
Osylaısha, óz renomesin aqtap shyqqan týrnırdiń qosalqy favorıti - «Habar» komandasy «SPORTINFORM CUP 2018» BAQ ókilderi arasyndaǵy alǵashqy joldastyq týrnırdiń jeńimpazy atandy. «QazAqparat» ekinshi oryndy enshiledi, al «SPORTINFORM» SAA Kýboktyń úshinshi ornyn ıelendi.
"Habar" komandasy
"KazAqparat" komandasy
"SPORTINFORM" komandasy
Tómendegi atalymdar boıynsha úzdik oıynshylar:
Týrnırdiń úzdik oıynshysy - Vıktor Alekseev (QazAqparat)
Úzdik qaqpashy- Aıbek Qabylsha (Habar)
Úzdik bombardır - Nursultan Qabylbek (Habar).
Týrnırdiń jeńimpazdary men júldegerlerin Qazaqstan fýtbolynyń maıtalmany, QFF prezıdentiniń keńesshisi Seıildá Baıshaqov, «QazAqparat» HAA bas dırektory Asqar Ýmarov marapattady.
- Qazaqstan fýtbol federatsııasynyń atynan «Sportınform kýbogy» týrnıriniń barlyq qatysýshylaryn ótken Jýrnalıster kúnimen jáne Astana qalasynyń 20 jyldyǵymen shyn júrekten quttyqtaımyn! BAQ ókilderiniń Qazaqstandaǵy fýtboldyń damýy men dáriptelýine qosyp jatqan úlesin aıtyp ketpeske bolmaıdy. Álemdegi №1 oıyn túrin ilgeri jyljytyp, sportpen, ásirese fýtbolmen aınalysatyndaryńyz qýantady. Atalmysh týrnır dástúrli túrde ótip turatynyna jáne keleshekte barlyq óńirlerge taraıtynyna senemin. Sebebi fýtbol -shekara bilmeıtin oıyn», - dedi Seıildá Baıshaqov.
