BAQ arasynda fýtboldan Seıdahmet Berdiquldy eske alýǵa arnalǵan týrnır ótedi
Alǵash ret baıraǵyn 1994 jyly kótergen týrnır barsha BAQ ókilderiniń taǵatsyzdana kútetin dop dodasyna aınaldy. Alaıda, karantındik shekteýlerge baılanysty dástúrli jarys uıymdastyrylmaı qalǵan bolatyn.
Osy oraıda Seıdahmet Berdiquldyń rýhyn ardaqtaý jáne otandyq BAQ ókilderiniń basyn qosyp, ózara yntymaqtastyqty arttyrý maqsatynda QR Aqparat jáne qoǵamdyq damý mınıstrligi týrnırdi «BAQ liga» qoǵamdyq qorymen qaıta jandandyryp otyr. Týrnır 27 maýsymda BAQ qyzmetkerleri kúni qarsańynda Nur-Sultan qalasynda ótedi.
QR Aqparat jáne qoǵamdyq damý mınıstri A.Ǵ. Balaeva «Dene shynyqtyrý ár adamnyń ómirinde mańyzdy ról atqarady jáne BAQ qyzmetkerleri de erekshelik emes. Atalǵan sharamen biz aqparat salasynyń damýyna úlken úlesin qosqan belgili áriptesterimizge qurmet kórsetemiz. Sondaı-aq, ol óskeleń urpaq úshin úlgi bolady dep senemin» - deı otyryp, respýblıkalyq jáne óńirlik BAQ-tardy týrnırge belsendi qatysýǵa shaqyrady.
Aıta keteıik, Seıdahmet Berdiqul (1933-1994) – Almaty oblysy, Jambyl aýdanyndadaǵy Qarakastek qystaǵynda dúnıege kelgen. 1956 jyly QazMÝ-diń jýrnalıstıka fakýltetin bitirgen. 1965-1970 jyldary «Qazaqstan pıoneriniń» redaktory, 1970-1986 jyldary «Lenınshil jas» (qazirgi «Jas alash») gazetiniń redaktory, 1986-1994 jyldary «Jalyn», «Balaýsa» baspalarynyń dırektory boldy, qazaq sporty janrynyń negizin qalady. 1960 jyldan bastap ádebı-kórkem shyǵarmalar jazýmen aınalysqan. Orys tilinde «Ostryı klınok» jınaǵy jaryq kórdi. Birtalaı týyndylary týysqan halyqtar tilinde aýdaryldy. «Qurmet Belgisi» ordenimen, medaldarmen marapattalǵan.
Shaǵyn fýtboldan Seıdahmet Berdiquldyń alǵashqy týrnıri qalamger dúnıeden ótkennen keıin 1994 jyly uıymdastyryldy. Bıyl 23-shi ret baıraǵyn jelbiretpek.
Týrnırge qatysatyn komandalar birneshe topqa (árbirinde 4 komandadan) bólinedi. Ár toptan eki úzdik komanda kelesi kezeńge shyǵady, ári qaraı pleı-off básekesine ulasady.
