BAQ: AQSh bıligi Raýl Kastrony qolǵa túsirý operatsııasyn daıyndap jatyr
ASTANA. KAZINFORM – Amerıka bıligi Kýba revolıýtsııasy jetekshileriniń biri, armııa generaly Raýl Kastroni qolǵa túsirý operatsııasyn júrgizý múmkindigin joqqa shyǵarmaıdy. Bul týraly The New York Times basylymy habarlady.
AQSh Ortalyq barlaý basqarmasynyń dırektory Djon Retklıff 14 mamyrda Kýbaǵa baryp, Raýl Kastronyń nemeresi Raýl Gılermo Rodrıges Kastromen kezdesti. Axios portaly derekkózderiniń málimetinshe, arnaıy qyzmet basshysy «Kýba túbegeıli ózgerister jasasa, AQSh ekonomıka jáne qaýipsizdik máseleleri boıynsha eleýli ózara is-qımylǵa daıyn» ekeni jónindegi Donald Tramptyń málimdemesin jetkizgen.
Buǵan deıin amerıkalyq BAQ Vashıngton 94 jastaǵy Kastroǵa aıyp taǵýǵa daıyndalyp jatqanyn habarlaǵan edi. Aıyptar 1996 jylǵy oqıǵaǵa baılanysty bolýy múmkin. Sol kezde Kýba áskerı-áýe kúshteri Maıamıde ornalasqan «Baýyrlar kómekke keledi» atty emıgranttyq uıymynyń eki ushaǵyn atyp túsirgen.
The New York Times basylymy osy jyldyń qańtarynda Vashıngton Venesýela prezıdenti Nıkolas Madýroǵa qarsy federaldyq aıyptardy basyp kirý men ony qolǵa túsirýge syltaý retinde paıdalanǵanyn eske saldy. Basylym málimetinshe, amerıkalyq sheneýnikter AQSh Kýbada «venesýelalyq stsenarııdi» qoldanýy múmkin ekenin joqqa shyǵarmaıdy.
Gazettiń jazýynsha, Kýbada operatsııa júrgizý týraly túpkilikti sheshim ázirge qabyldanǵan joq. The New York Times basylymynyń birneshe derekkózi mundaı áreketke AQSh basshylyǵy kelisim bermeýi múmkin dep sanaıdy. Alaıda Kastrony qolǵa túsirý qaýpiniń ózi Kýba bıligin Vashıngtonǵa belgili bir jeńildikter jasaýǵa kóndirýi yqtımal ekeni aıtylǵan.
Aıta keteıik, osy aıdyń basynda Tramp ákimshiligi Kýbaǵa qarsy áskerı kúsh qoldanýdy qarastyryp jatqanyn jazdyq.
Onyń aldynda, sáýir aıynda AQSh prezıdenti Donald Tramp Kýbaǵa qarata 70 jyl kútken kúnniń týýy alys emes ekenin málimdedi.
