BAIQYMYZ: Astanada ótetin gastrofestıvalde tanymal juldyzdar óner kórsetedi
ASTANA. KAZINFORM — Astanada 11-12 shilde kúnderi BAIQYMYZ halyqaralyq gastrofestıvali aıasynda el estradasynyń tanymal juldyzdarynyń qatysýymen kontsertter uıymdastyrylyp, ulttyq at sportynyń aýqymdy baǵdarlamasy ótedi, dep habarlaıdy elorda ákimdiginiń resmı saıty.
Festıval qonaqtary Sadraddin, Qazybek Quraıysh, Ǵazızhan Shekerbek, «Turan» etno-folklorlyq ansambli, Jubanysh Jeksen, Qaırat Baekenov pen «Format» toby, Qydyráli Bolmanov, Qaraqat Ábildına jáne basqa da óner ıeleriniń kontsertin tamashalap, qazaqtyń biregeı at sporty túrleri jaıly mol maǵlumat ala alady.
At sporty baǵdarlamasy Astana qalasyndaǵy «Arǵymaq» at sporty kesheninde ASIA KOKPAR LEAGUE men ER QANATY birlesip uıymdastyrýymen ótedi. Festıval qonaqtaryn qazaqtyń at sporty mádenıetin, shabandozdardyń sheberligin jáne ulttyq sporttyń kórkemdigin pash etetin tartysty jarystar men erekshe kórsetilimder kútedi.
Baǵdarlamada:
• ER QANATY jylqylar sherýi;
• ASIA KOKPAR LEAGUE uıymdastyratyn kókpar saıysy;
• Shógen oıyny;
• At ústindegi Kvıddıch oıyny;
• Aýdaryspaq;
• Jekpe-jek attarynyń kórsetilimi;
• Shabandozdardyń óneri.
— Bıylǵy baǵdarlamada kreatıvti ındýstrııalardy damytýǵa erekshe nazar aýdarylǵan. Festıval aıasynda alǵash ret Shógen oıyny men at ústindegi Kvıddıch biryńǵaı tujyrymdama aıasynda usynylady. Dástúrli at sporty mádenıeti men zamanaýı kórermendik formattardyń úılesýi jastardyń qyzyǵýshylyǵyn arttyryp, at sportynyń tanymaldylyǵyn keńeıtýge, sondaı-aq ulttyq qundylyqtardyń búgingi zaman talabyna saı jańa mazmunda damýyna jol ashady, — deıdi uıymdastyrýshylar.
At sporty baǵdarlamasy festıvaldiń negizgi alańdarynyń birine aınalyp, ulttyq murany, sportty, mádenıetti jáne otbasylyq demalystyń zamanaýı úlgilerin toǵystyrady. Kelýshiler qazaqtyń biregeı at sporty túrlerimen tanysyp, ulttyq mádenıettiń tereń tamyryn sezinip, dástúr men jańashyldyq úndesken erekshe sharanyń kýási bolady.
Aıta ketsek, festıvalge qatysý úshin bılet alý qajet. Kelýshilerge bir kúnge nemese festıvaldiń eki kúnine birden jaramdy bıletter usynylady.
Zeınetkerler men 16 jasqa deıingi balalar is-sharaǵa tegin qatysa alady.
Buǵan deıin festıvalde 60-tan astam qymyz óndirýshi óz ónimin usynatynyn jazǵanbyz.
