BaiQymyz-2026: Qymyzynaı aýylynyń qymyzy úzdik dep tanyldy
ASTANA. KAZINFORM — Qymyzdyń qasıetin dáriptep, ulttyq dástúrdi ulyqtaǵan BaiQymyz-2026 halyqaralyq festıvali bıyl da Astanada keń kólemde ótti. Eki kún boıy «Qazanat» ıppodromy ulttyq óner men qymyz mádenıetiniń úlken ordasyna aınaldy.
Festıvalge elimizdiń barlyq óńirinen, sondaı-aq Qyrǵyzstan men Reseıdiń Saha Respýblıkasynan kelgen 60-tan astam qymyz óndirýshi qatysqan.
Bul týraly BaiQymyz-2026 festıvaliniń joba avtory Jumajan Qaltaev Jibek Joly telearnasynyń «Búgin.LIVE» baǵdarlamasynda aıtty.
Uıymdastyrýshylardyń aıtýynsha, bıyl qazylar alqasynyń quramyna qymyzdyń tarıhy men emdik qasıetin zerttep júrgen ǵalymdar arnaıy shaqyrylǵan. Olar ulttyq sýsyndardy dámi, sapasy jáne tabıǵı quramy boıynsha baǵalaǵan.
— Baıqaý úsh nomınatsııa boıynsha ótti: «BaiQymyz», «Em qymyz» jáne «Halyq tańdaýy». «BaiQymyz» nomınatsııasynyń jeńimpazdaryn ǵalymdar dámi men sapasyna qaraı anyqtady. «Emdik qymyz» atalymynda dárýmenge baı, quramy taza qymyzdar irikteldi. Al «Halyq tańdaýy» nomınatsııasynda ónimniń dámin kelýshiler baǵalasa, qazylar alqasy óndirýshilerdiń marketıngtik jarnamalaryna nazar aýdardy. Bas júldege avtokólik tabystaldy. Al ózge nomınatsııalardyń jeńimpazdary aqshalaı syılyqpen marapattaldy, — dedi Jumajan Qaltaev.
Festıvaldiń bas júldesin Aqmola oblysyna qarasty Qymyzynaı aýylynyń turǵyny Álııa Qabdýlına jeńip aldy. Stýdııa qonaǵy bolǵan ol sol sáttegi áserimen bólisti.
— Áli kúnge deıin tolqyp turmyn. Jeńiske jetemin dep oılaǵan joqpyn. Barlyǵy sııaqty jeńimpazdyń esimin kútip otyrdym. Óz aýylymnyń ataýy atalǵan sátte erekshe qýandym. Sahnaǵa shyqqandaǵy tolqynysymdy kópshilik te baıqaǵan shyǵar. Bul jeńis — otbasymyzdyń uzaq daıyndyqtarynyń jemisi. Daıyndyq barysynda nemerelerim: «Áje, kólikti biz alýymyz kerek», — dep jıi aıtatyn. Olardyń tilegi qabyl boldy, — dedi ol.
Álııa Qabdýlına byltyr da osy festıvalge qatysyp, úshinshi oryn alǵan eken. Sodan keıin ol otbasymen birge qymyz daıyndaý tásilin qaıta jetildirip, arnaıy saba da jasatqan.
— Bylyr qymyzdy úsh kúbide ǵana ashytatynbyz. Kúbilerdiń ózi ata-enemizden qalǵan kóne. Festıvalden keıin balam saba jasatýdy qolǵa aldy. Taza teriden jasalǵandyqtan, sabany ázirleý ońaı bolmady. Tek úshinshi márte ǵana talapqa saı shyqty. Sabada ashytylǵan qymyzdyń dámi kúbidegi qymyzdan múlde bólek ekenin baıqadyq. Saba qymyzdyń jumsaq ári balǵyn dámin uzaq saqtaıdy. Al kúbide ashytylǵan qymyzdyń dámi aşy bolyp, ýaqyt óte kele ashyp bastaıdy, — dedi Álııa Qabdýlına.
Jeńimpazdyń aıtýynsha, endigi maqsat — qol jetkizgen deńgeıden tómendemeı, qymyzdyń sapasyn odan ári jetildirý.
— Qymyznaı aýylynyń atyn keńinen tanytyp, ónimimizdi kópshilikke usynǵymyz keledi. Ásirese, jastardyń kúndelikti sýsynyna aınalsa eken deımiz. Sebebi qymyzdyń shıpasy mol, — dedi ol.
Aıta keteıik, Sheteldikter Astanadaǵy BaiQymyz-2026 festıvali týraly áserimen bólisti.
