BaiQymyz-2026 festıvalinde 60-tan astam qymyz óndirýshi óz ónimderin usyndy
ASTANA. KAZINFORM – Búgin, 11 shildede Astanadaǵy «Qazanat» ıppodromynda eki kúnge sozylatyn BaiQymyz-2026 halyqaralyq gastrofestıvali ótip jatyr.
Festıvalge Qazaqstannyń túrli óńirlerinen kelgen 60-tan astam qymyz óndirýshi, sondaı-aq Qyrǵyz Respýblıkasy men Reseıdiń ıAkýtııa Respýblıkasynan kelgen qatysýshylar jınaldy.
Kelýshiler qymyzdyń ártúrli túrinen dám tatyp, ony daıyndaý dástúrimen tanysyp, úzdik óndirýshiler anyqtalatyn halyqaralyq baıqaýdy tamashalaı alady.
Festıval aıasynda qonaqtarǵa ulttyq taǵamdardy ázirleýge arnalǵan aspazdyq shoýlar men sheberlik sabaqtary, «Úzdik qazy» baıqaýy, kókpar, báıge, aýdaryspaq, qyz qýý, dástúrli sadaq atýdan jarystar, sondaı-aq «Qoı kóterý», «Jilik syndyrý», shógen oıyny, at ústindegi kvıddıch, jaýyngerlik jylqylardyń kórsetilimi, ER QANATY jylqylarynyń sherýi jáne at ústi óneri sheberleriniń qoıylymdary usynylady.
Sonymen qatar festıval aıasynda ulttyq mádenıet pen salt-dástúrdi nasıhattaýǵa baǵyttalǵan «Dástúr sáni: BaiQymyz-2026» baıqaýy ótip jatyr. Onyń qorytyndysy 12 shildede jarııalanady.
Bas sahnada Sadraddin, Qazybek Quraıysh, Ǵazızhan Shekerbek, «Turan» etno-folklorlyq ansambli, Jubanysh Jeksen, Qaırat Bákenov pen Format toby, Qydyráli Bolmanov pen Qaraqat Ábildına jáne basqa da ánshiler óner kórsetedi.
Festıvalge kirý úshin bir kúnge nemese eki kúnge bılet satyp alý qajet. Al zeınetkerler men 16 jasqa deıingi balalar úshin kirý tegin.
Aıta ketelik BaiQymyz-2026: birqatar qoǵamdyq kóliktiń júrý baǵyty ýaqytsha ózgergen edi.
