BaiQymyz-2026: Elorda turǵyndary 60-tan asa qymyzdyń dámin tata alady
ASTANA. KAZINFORM — «BaiQymyz-2026» festıvalinde 60-tan astam qymyz óndirýshi óz ónimin usynady, dep habarlaıdy Astana qalasy ákimdiginiń resmı saıty.
Astanadaǵy «Qazanat» ıppodromynda 11-12 shilde kúnderi ulttyq dástúrlerdi, mádenıetti jáne qazaqtyń ulttyq taǵamdaryn nasıhattaıtyn BaiQymyz-2026 halyqaralyq gastronomııalyq festıvali ótedi.
Festıvalge Qazaqstannyń ár óńirinen 60-tan astam qymyz óndirýshi, sondaı-aq Qyrǵyz Respýblıkasy men Reseı Federatsııasynyń (ıAkýtııa) ókilderi qatysady. Kelýshiler ulttyq sýsynnyń san túrinen dám tatyp, ony ázirleý barysymen tanysa alady.
— Festıvaldiń basty oqıǵasy — halyqaralyq qymyz baıqaýy. Onda úzdik óndirýshiler eń úzdik ataný úshin baq synaıdy. Sondaı-aq qonaqtarǵa arnap aspazdyq shoýlar, ulttyq taǵamdardy ázirleý boıynsha sheberlik sabaqtary, «Úzdik qazy» baıqaýy, kókpar, báıge, aýdaryspaq, qyz qýý, dástúrli sadaq atýdan jarystar, sondaı-aq «Qoı kóterý», «Jilik syndyrý», at ústindegi kvıddıch jáne basqa da ulttyq oıyndar ázirlendi. Eki kún boıy bas sahnada tanymal ónerpazdar men shyǵarmashylyq ujymdar óner kórsetedi, — deıdi uıymdastyrýshylar.
Aıta keteıik, festıval bıletterin resmı saıttar arqyly satyp alýǵa bolady. Kelýshilerge bir kúnge nemese eki kúnge arnalǵan bıletter usynylǵan. Zeınetkerler men 16 jasqa deıingi balalar úshin kirý tegin.
Osyǵan deıin festıvalde úzdik ulttyq obraz ıesine at mingizetini habarlandy.
