«BaiQymyz-2026»: balalarǵa arnalǵan rodeo, konkýr jáne ulttyq oıyndar baǵdarlamasy ázirlendi
ASTANA. KAZINFORM — Astanada 11-12 shilde kúnderi ótetin BaiQymyz-2026 halyqaralyq gastronomııalyq festıvali aıasynda kishkentaı qonaqtarǵa ulttyq naqyshtaǵy mazmundy oıyn-saýyq baǵdarlamasy usynylady, dep habarlaıdy elorda ákimdiginiń resmı saıty.
Festıval aýmaǵynda eki kún boıy «BaiQymyz Qulynshaq» balalar etnoalańy jumys isteıdi. Munda balalar qazaqtyń salt-dástúrimen, mádenıetimen jáne ulttyq oıyndarymen tanysa alady. Baǵdarlamada sadaq atý, panna-fýtbol, nysana-fýtbol, oıyn alańdary, labırıntter, «Altybaqan» ulttyq oıyny jáne búkil otbasyǵa arnalǵan ózge de tanymdyq ári oıyn-saýyq is-sharalary uıymdastyrylady.
Festıvaldiń eń qyzyqty sharalarynyń biri – «BaiQymyz Qoshaqan» balalar rodeosy. Jas qatysýshylar eptiligi men batyldyǵyn synap, ulttyq at sporty mádenıetiniń elementterimen tanysady. Festıvaldiń ekinshi kúni jas shabandozdar arasynda konkýrdan jarys ótip, olar atpen júrý sheberlikterin kórsetedi. Sonymen qatar qonaqtar «Qambar ata» sýretter jáne sándik-qoldanbaly óner kórmesin tamashalap, kontserttik baǵdarlamalardy kóre alady.
Sondaı-aq ulttyq dástúrlermen, qolónermen jáne Qazaqstannyń mádenı murasymen jaqynyraq tanysýǵa múmkindik beriledi.
Aıta keteıik, festıvalge kirý úshin bılet satyp alý qajet. Bir kúnge nemese eki kúnge arnalǵan bılet túrleri qarastyrylǵan. Al zeınetkerler men 16 jasqa deıingi balalar festıvalge tegin kire alady.
Budan buryn Astanada ótetin gastrofestıvalde tanymal juldyzdar óner kórsetetini belgili boldy.
