«Baikonyr invest» ınvestıtsııalyq forýmynda otyzǵa jýyq kelisim men memorandýmǵa qol qoıyldy - Qyzylorda
QYZYLORDA. QazAqparat - Qyzylordada halyqaralyq áriptestikti damytýǵa arnalǵan ІH «Baikonyr invest» ınvestıtsııalyq forýmy ótip jatyr, dep habarlaıdy QazAqparat tilshisi.
Forýmǵa halyqaralyq jáne otandyq bıznes salasynyń ókilderi, qarjy ınstıtýttary men korporatsııalardyń, ǵylymı-zertteý ınstıtýttarynyń jetekshileri, sondaı-aq, Reseı, Qytaı, Ózbekstan, Iran, Túrkııa, Ońtústik Koreıa, Polsha jáne basqa da memleketterdiń delegatsııalary qatysýda. 
Investforýmdy Qyzylorda oblysynyń ákimdigi "KAZAKH INVEST" Ulttyq kompanııasy» AQ qoldaýymen uıymdastyryp otyr.
Forým aıasynda qatysýshylardyń ınvestıtsııalyq jobalarynyń kórmesi, sonymen qatar Reseı, Iran, Qytaı jáne Ózbekstan elderimen ózara yntymaqtastyqtyń keleshegi taqyrybynda sektsııalyq otyrystar, V2V, G2B, G2G kezdesýleri ótti. Nátıjesinde yntymaqtastyq týraly otyzǵa jýyq kelisim men memorandýmǵa qol qoıyldy.
Investforýmnyń plenarlyq otyrysynda Qyzylorda oblysynyń ákimi Qyrymbek Kósherbaev qatysýshylarǵa sáttilik tilep, aımaqtyń ınvestıtsııalyq múmkindikteri týraly baıandady.
«Bizben áriptestik ornatýǵa nıetti azamattardy birlesip jumys isteýge shaqyramyz. Biz ınvestorlardyń barlyq tıimdi usynystaryn qoldaımyz. Olarǵa qolaıly jaǵdaı jasaýǵa daıynbyz. Eń bastysy, júıeli jumys júrgizetin isker azamattarmen áriptes bolýdy kózdeımiz»,- dedi aımaq basshysy.
Forýmnyń plenarlyq otyrysynda QR Syrtqy ister vıtse-mınıstri Ǵalymjan Qoıshybaev, QR Qorǵanys jáne aeroǵarysh ónerkásibi mınıstrligi Aeroǵarysh komıtetiniń tóraǵasy Erkin Shaımaǵambetov jáne áriptestikke múddeli kompanııalar, dıplomatııalyq ókildikter men halyqaralyq jáne otandyq qarjy uıymdarynyń, damý ınstıtýttarynyń ókilderi sóz sóıledi.
Forýmnyń ekinshi kúninde meımandar túrki áleminiń abyzy Qorqyt ata kesheni jáne «Baıqońyr» ǵarysh kesheniniń murajaıymen tanysady dep josparlanýda.
