«Baikonyr invest» forýmy: 25 memorandýmǵa qol qoıylmaq
Investıtsııalyq forýmnyń bıylǵy taqyryby - «Qyzylorda: turaqty órleý, ınvestıtsııalyq yntymaqtastyqtyq úshin jańa múmkindikter». Forým aıasynda jalpy quny 100 mlrd teńgege jýyq jobalardy júzege asyrý úshin 25 memorandým, 1 kelisimshartqa qol qoıylady. Olardyń qatarynda ónerkásip salasynda 14, agroónerkásiptik sektorda 9, memlekettik jekeshelik áriptestik baǵyty boıynsha 3 ınvestıtsııalyq jobalar bar.
«Baikonyr Invest» jyl saıyn 300-den astam sheteldik jáne otandyq bıznes-kóshbasshylarynyń, ınvestıtsııalyq kompanııa basshylarynyń, ǵylymı-zertteý ınstıtýttarynyń ókilderi men ekonomıkanyń túrli salalaryndaǵy sarapshylardy basyn qosyp keledi.
Forýmǵa sheteldik jáne otandyq bıznes-qaýymdastyq ókilderi, ınvestıtsııalyq kompanııalardyń basshylary keldi. Olardyń qatarynda Koreıanyń «K2AT», Frantsııanyń «Total Eren», Bolgarııanyń «NES» kompanııalary jáne ǵylymı-zertteý ınstıtýttary ókilderi arnaıy kelgen. Sondaı-aq, forým jumysyna Iran, Frantsııa, Germanııa, Makedonııa, Nıderlandy Koroldigi, Koreıa, Kanada, Slovenııa, Qytaı, Reseı sııaqty alys jáne jaqyn 10 memleketten ınvestorlar keldi.
«Bıyl ınvestıtsııalyq forým on birinshi márte ótkizilýde. Alǵash ret ol 2013 jyly qolǵa alynǵan edi. Aldyńǵy 10 forýmnyń nátıjesi boıynsha 130-den astam memorandýmǵa qol qoıyldy. Oblys ekonomıkasyna qomaqty ınvestıtsııa tartyldy» -, dedi oblys ákimi Qýanyshbek Ysqaqov.
Forým qatysýshylary endi «Baıqońyr» ǵarysh aılaǵyna jáne «Qorqyt ata» memorıaldyq keshenin aralaıdy.
