«BaigeNews.kz jýrnalısi URKER syılyǵyn jeńip aldy

NUR-SULTAN. QazAqparat – «QazAqparat» AQ «BaigeNews.kz portalynyń jýrnalısi Ánýar Ábdirahmanov baspa, radıo, ınternet-jýrnalıstıka salasyndaǵy «URKER-2021» ulttyq báıgesinde jeńiske jetti, dep habarlaıdy QazAqparat tilshisi.

Laýreattardy marapattaý rásimi «Qazmedıa» ortalyǵynda ótip jatyr. Oǵan QR Aqparat jáne qoǵamdyq damý mınıstri Aıda Balaeva jáne birqatar BAQ jetekshileri qatysýda.

Ánýar Ábdirahmanov «URKER-2021» ulttyq báıgesiniń «Jyldyń úzdik reportajy» nomınatsııasynda jeńimpaz atandy. Syılyqty «Qazaq ádebıeti» gazetiniń bas redaktory Dáýren Qýat tabys etti.

Al «Jyldyń úzdik analıtıkalyq materıaly» atalymynda «Aqıqat» jýrnalynyń qyzmetkeri Dına Imambaeva ozyq dep tanyldy. Jeńimpazdy QR Parlamenti Senatynyń depýtaty Aıgúl Qapparova jarııalady.

Sonymen birge, «Táýelsizdiktiń 30 jyldyǵyna arnalǵan úzdik materıal» nomınatsııasynda «Semeı tańy» gazetiniń tilshisi Rıza Moldasheva jeńiske jetti. Marapatty táýelsiz Qazaqstannyń eń alǵashqy Aqparat mmınıstri, memleket jáne qoǵam qaıratkeri, jýrnalıst Qýanysh Sultanov tabystady.

Barlyq jeńimpazdarǵa «URKER» estelik músinshesi jáne bir mıllıon teńge mólsherindegi aqshalaı syılyq tabystaldy.

Aıta keteıik, «URKER-2021» Ulttyq báıgesi bıyl besinshi ret uıymdastyrylyp otyr. Baıqaý 11 nomınatsııa boıynsha ótkizilýde, oǵan «Táýelsizdiktiń 30 jyldyǵyna arnalǵan úzdik materıal» nomınatsııasy qosyldy.

Jýrnalısterden jalpy sany 340 jumys keldi, al úzdik jumystardy bedeldi jýrnalıster, elimizdiń shyǵarmashylyq ıntellıgentsııasynyń ókilderi men halyqaralyq medıaekspertterden quralǵan qazylar alqasy anyqtady.

QazAqparat «Jyldyń úzdik jańalyqtar portaly» atandy.

Kórermender marapattaý rásimin urker-awards.kz resmı saıtynan tikeleı efırde tamashalaı alady.