Bahtıer Zaınýtdı́nov mansabyn aıaqtaýy múmkin be

ASTANA. KAZINFORM - Qazaqstandyq fýtbolshy Bahtıer Zaınýtdı́nov alǵan jaraqaty saldarynan mansabyn jalǵastyra almaýy múmkin.

Qazaqstan quramasy men Túrkııanyń «Beshıktash» klýbynyń jartylaı qorǵaýshysy jaraqat saldarynan 2,5 aıdan beri jasyl alańǵa shyqqan joq. Áleýmettik jeli betterinde «bul Bahtıerdiń mansabyn aıaqtaýyna negiz bolýy múmkin» degen aqparat tarap jatyr.

Oǵan túrik jýrnalısi Serkan Dıkme Zaınýtdınovta sińir aımaǵynda isiný baıqalǵany jóninde aıtqan aqparaty negiz bolǵan. Ol jaqyn arada jaraqattyń sıpaty men qalpyna keltirý merzimi tekseriletinin atap ótken. Sol sebepti onyń fýtbol mansabyna áser etýi múmkin máseleler bar.

Aıta ketsek, Bahtıer Zaınýtdı́nov fýtboldan Qazaqstan quramasynyń 2026 jylǵy álem chempıonaty irikteý kezeńindegi naýryz aıynda ótken eki oıynyna daıyndyqqa kelgen edi. Ulttyq qurama dárigerleriniń tekserýinen keıin ol oqý-jattyǵý jıynyna qatysqan joq.

- Dárigerler tekserýinen keıin Bahtıerdiń jaraqaty bar ekeni anyqtaldy. Sondyqtan daıyndyqqa qatyspady. Al mansaby aıaqtaý jóninde bizge eshqandaı aqparat kelip túsken joq, - dedi Qazaqstan fýtbol federatsııasynyń baspasóz hatshysy Seıil Qojataı.

Bahtıer Zaınýtdınov 1998 jyldyń 2 sáýirinde dúnıege kelgen. Buǵan deıin qazaqstandyq «Taraz», «Astana» fýtbol klýbtarynda, Reseıdiń «Rostov» jáne TsSKA komandalarynda dop tepti.

Bahtıer Zaınýtdınov ystanbuldyq klýbpen 2023 jyldyń 18 tamyzynda kelisimshartqa qol qoıǵan bolatyn. Ol 2027 jyldyń 30 maýsymyna deıin atalǵan klýb sapynda oınaı alady.