Bahtııar Máken qaramaǵyndaǵy qyzmetkerdiń jemqorlyq áreketine qatysty pikir bildirdi

NUR-SULTAN. QazAqparat - Nur-Sultan qalasy ákiminiń orynbasary Bahtııar Máken qaramaǵyndaǵy qyzmetkerdiń jemqorlyq áreketi úshin jazalaǵanyna qatysty túsinikteme berdi, dep habarlaıdy QazAqparat tilshisi.

«Memlekettik zań bar, ıaǵnı sybaılas jemqorlyqpen kúres zań sheńberinde bári bekitilgen. Biz saıası qyzmette jumys isteıtindikten qyzmetimizge qatysty sheshimdi zań aıasynda joǵary turǵan basshylar qabyldaıdy. Men jumystan ketý týraly ótinishimdi berdim, biraq basshylar meni jumysta qaldyrý jóninde sheshim qabyldady», - dedi B. Máken tilshilerdiń suraǵyna jaýap bere otyryp.

Sondaı-aq, qala ákiminiń orynbasary sógis alǵanyn da tilge tıek etti.

«Basshylar meni jumysta qaldyrsa, demek odan ári qyzmetimdi jalǵastyra beremin. Joǵary basshylyq qandaı sheshim qabyldaıdy, men ony sol kúıinde qabyl alamyn. Jáne endigi ýaqytta osy sekildi qatelikterdiń oryn almaýy maqsatynda jumys isteımin», - dedi ol.

Eske sala ketsek, keshe elorda ákiminiń orynbasary Bahtııar Máken qaramaǵyndaǵy qyzmetkerdiń jemqorlyq áreketi úshin jazalanǵan bolatyn.