Bahtııar Artaevtyń qyzdy urǵanyna senbeımin - A. Mahmetov
ASTANA. QazAqparat - «Men Bahtııar Artaevtyń qyzdy urǵanyna senbeımin», - dedi «Samuryq-Qazyna» Ulttyq ál-aýqat qorynyń qoǵammen baılanys departamenti dırektory jáne «Astana» memlekettik qorǵanshylyq jáne qamqorshylyq jónindegi mekemesiniń múshesi Aıdar Mahmedov Vesti.kz saıtyna bergen suhbatynda.
«Sebebi, men Bahtııardy jaqsy tanımyn. Bir jyl kóleminde onymen tyǵyz jumys jasadym. Ol sabyrly, qaıyrymdy jan. Qyzbalyqqa salynǵanyn kórgenim joq. Ózi týraly bul daýly aqparatty keshe oǵan birinshi habarladym, óıtkeni ol Tarazǵa ketip qalǵan bolatyn. Men tipti bul keleńsiz jaıǵa senbeımin de. Bahtııardyń ózi de qol kótermegenin aıtty. Ózińiz oılańyzshy, ol Olımpıada chempıony, onyń judyryǵy qatty, soqqysy aýyr emes pe?! Endi ol qyzdy urdy degenge óz basym sene almaımyn»,- dedi Aıdar Mahmetov.
Onyń aıtýynsha, jaǵdaı budan da ýshyqpas úshin Olımpıada chempıony endi «jábirlenýshimen» sóılespek.
« Bul daýly másele kóp uzamaı basylady degen oıdamyn. " Túımedeıdi túıedeı" qylatyndardy túsinbeımin. Iá, Bahtııardyń sol bı alańynda bolǵany ras. Biraq, árkim óz qabiletine qaraı bıleıdi ǵoı, bı kezindegi bireýlerdiń qımyl- áreketin daýǵa aınaldyrýdyń qajeti joq. Men Bahtııardyń aıtqanyna senemin. Onyń elimiz úshin qandaı abyroıly jeńis ákelgenin umytpaıyq», - degen suhbatynda Aıdar Mahmedov.
