Bahtııar Artaev pen Vasılıı Levıt - Qaraǵandydaǵy JOO magıstranttary
ASTANA. QazAqparat - Qaztutynýodaǵy Qaraǵandy ekonomıkalyq ýnıversıtetiniń birinshi kýrs stýdentteri ataqty sportshylarmen kezdesti, dep habarlaıdy oblys ákimdiginiń resmı saıty .
Stýdentter mádenıet saraıynda «Táýelsiz elimniń týyn jelbiretken chempıondar» degen ataýmen kontsert ótti.
Atap óter jaıt, bıylǵy oqý jylynda QEÝ magıstratýrasynda «juldyzdy» top jınaldy. Jańadan kelgender qatarynda tanymal sportshylar men ataqty aıtysker Dıdar Kámıev bar.
- Jańa oqý jylynda QEÝ magıstranttar quramy búkil Qazaqstan biletin jáne qurmetteıtin kóptegen tabysty adamdarmen tolyqty. Olardyń qatarynda: Dıdar Kámıev, Qamshybek Qonqabaev, Vasılıı Levıt jáne Bahtııar Artaev. Búgin olar 1-shi kýrs stýdentterimen kezdesýge keldi. Bizdiń ýnıversıtet jyl saıyn osyndaı merekelik sharalar uıymdastyryp otyrady, - dedi qoǵammen baılanys boıynsha bas maman Leıla Ivadılınova.
Osyndaı áıgili adamdardyń basyn bir zalda jınaý múmkindigi jıi týa bermeıdi. Qonaqtar QEÝ rektory, professor Erqara Aımaǵambetovtyń shaqyrýyn qabyldap, oqý ordasynyń stýdentterimen kezdesýge kelgen.
«Juldyzdy» magıstranttardan basqa kezdesýge ózge dea tanymal tulǵalar keldi. Olardyń keıbiri QEÝ-niń túlegi bolsa, keıbiri áli de ýnıversıtette joǵarǵy bilim alyp jatyr. Qonaqtar qatarynda Olımpıada chempıony, QR Parlamenti Májilisiniń depýtaty Serik Sápıev, QR boks boıynsha Ulttyq quramasynyń bas jattyqtyrýshysy Myrzaǵalı Aıtjanov, Álem Kýbogynyń kúmis júldegeri, Eýropa chempıony Serik Nurqazov, Olımpıada oıyndarynyń qola júldegeri Serik Eleýov, QR Parlamenti Senatynyń burynǵy depýtaty, bıznesmen, QEÝ qurmetti professory Erlan Nyǵmatýlın bar. Birinshi kýrs stýdentterimen Azııa chempıonatynyń kúmis júldegeri, álem chempıonatynyń qola júldegeri Ablaıhan Júsipov te kezdesti. Ol osy JOO-nyń 4-shi kýrs stýdenti bolyp tabylady.
Ómirde belgili bir jetistikterge qol jetkizgen bul tulǵalardyń barlyǵyn eńbekqorlyq, maqsatkerlik, jeńiske degen ynta jánede eń bastysy - Otanǵa degen mahabbaty biriktiredi.
- Bıylǵy jyly men QEÝ-niń magıstratýrasyna «kedendik is» mamandyǵy boıynsha tústim. Bul oqý ordasyn bekerden tańdaǵan joqpyn, munda árdaıym sportshylarǵa qoldaý kórsetiletinin bilemin. Birinshi kýrs stýdentterine maqsatkerlik pen sáttilik tileımin, - dedi boks boıynsha Qazaqstan quramasynyń múshesi, 2017-shi jyly Germanııada ótken bokstan álem chempıonatynyń kúmis júldegeri Qamshybek Qonqabaev.
Esterińizge sala keteıik, QEÝ magıstratýrasyna «kedendik qyzmet» mamandyǵy boıynsha Olımpıada oıyndarynyń ıegeri Vasılıı Levıt tústi. Sonymen qatar bul joǵary oqý ornynda tanymal boksshy, Olımpıada chempıony Bahtııar Artaev ta oqıtyn bolady. Ol «memlekettik jáne jergilikti basqarý» mamandyǵyn tańdaǵan. Al ataqty aıtysker Dıdar Kámıev «quqyqtaný» boıynsha bilimin jetildiredi.
Oladyń barlyǵy memlekettik bilim grantyn alyp, tegin oqıdy. Magıstrlik kýrs eki jylǵa sozylady.
