Bahtııar Artaev: Alvarespen revansh ótkizý Genaǵa aýyrlaý bolatyn sekildi

ASTANA. QazAqparat - Meksıkalyq «Kanelomen» kelesi aıqas Gennadıı Golovkınge aýyr tııýi múmkin. 2004 jylǵy Afıny Olımpıadasynyń chempıony, Vel Barker kýbogynyń ıegeri Baqtııar Artaev OKQ-da ótken baspasóz máslıhatynda osylaı dep málim etti, dep habarlaıdy «QazAqparat» HAA tilshisi.

«Jalpy, Gennadıı Golovkın ekeýimiz bes ret kezdesken bolatynbyz. Genanyń búkil ádisterin, qalaı qozǵalatynyn, qalaı soǵatynyn, osal tustaryn da jatqa bilemin. Sondyqtan, Gena men «Kanelony» zerdeleı kele ózim úshin jalpylama teń dárejede boks bolatynyna kózim jetken edi. Óıtkeni, men ózim de Alvarespen shyqsam, sondaı jekpe-jek bolar edi dep joramaldadym. Al aıqas aldynda nokaýt bolmaıdy dep aıtqanymdaı, Alvarestiń sońǵy kezdesýlerin tamashalasańyzdar, tájirıbesi aıtarlyqtaı ósip keledi. Ol shyqqan Mıgel Kottany, Meıvezerdi de alaıyq. Ondaı qarsylastar Gennadıı Golovkınde bolǵan joq», - deıdi Baqtııar Artaev.

Boks chempıony sonymen birge, qos boksshynyń arasyndaǵy revanshqa qatysty oıyn aıtty.

«Eger ekeýi josparlap otyrǵandaryndaı, kelesi jyldyń maýsym nemese mamyr aılarynda kezdesip qalyp jatsa, Gennadııge sál aýyrlaý bolatyn sekildi. Kózqarasym arqyly eshqaıda bura tartqym kelmeıdi. Taǵy da bir jyl ótse, bizge ol keri áserin tıgizýi múmkin. Al jas ári kúsheıip kele jatqan Alvares daıyndyǵymen babynda bolyp kelýi yqtımal. Ashyǵyn aıtý kerek, revanshtyń sondaı keri jaǵy bar. Al degenmen, baǵy jansa aýyr soqqysy bar Gena máseleni bir soqqymen sheship ketýi múmkin», - dedi Baqtııar Artaev.